కుక్క కరిచిన గేదె పాలు తాగారు.. హాస్పిటల్‌కు క్యూ కట్టారు!

Kumuram Bheem Asifabad: కుక్క కరిచిన గేదె పాలు తాగిన గ్రామస్థులు.. భయంతో ఆసుపత్రికి క్యూ కట్టారు. పాలు వినియోగించిన 302 మంది గ్రామస్థులు యాంటీ రెబిస్ వ్యాక్సిన్ వేయించుకున్నారు. ఈ ఘటన కొమురం భీం ఆసిఫాబాద్ జిల్లా చింతలమానేపల్లి మండల కేంద్రంలో చోటు చేసుకుంది. వివరాల్లోకి వెళితే.. మండల కేంద్రానికి చెందిన కాసబోయిన నానయ్య అనే పాడి రైతుకు 16 గేదెలు ఉన్నాయి. పాడి గేదెల పాలు విక్రయిస్తూ జీవన సాగిస్తుంటూడు. అయితే రెండు నెలల క్రితం అందులోని ఓ గేదెకు పిచ్చికుక్క కరిచింది. ఆ విషయం ఎవరికీ చెప్పకుండా దాని పాలు, పెరుగు గ్రామంలోని వందలాది మందికి విక్రయించాడు. అయితే రెండ్రోజల క్రితం కుక్క కరిచిన గేదె దూడ ఉన్నట్లుండి చనిపోయింది. నానయ్య వద్ద పాలు, పెరుగు కొనుగోలు చేసే వారికి ఈ విషయం తెలిసింది. దీంతో వారు భయంతో వణికిపోయారు. వెంటనే గ్రామ పంచాయతీ సిబ్బందికి విషయం తెలియజేశారు. వారు వెంటనే స్పందించి పంచాయతీ ఆఫీస్‌లో మెడికల్ క్యాంపు ఏర్పాటుచేశారు. నానయ్య వద్ద పాలు, పెరుగు కొనుగోలు చేసి వినియోగించిన 302 మందికి యాంటీ రేబిస్ వ్యాక్సిన్ వేయించారు. బాధితుల్లో మండల ఆఫీసర్లు కూడా ఉండటం గమనార్హం.

అయితే పాలు వేడి చేసిన తర్వాత వినియోగిస్తే.. ఎటువంటి ప్రమాదం ఉండదని వెటర్నరీ డాక్టర్లు చెబుతున్నారు. దూడ పొదుగు వద్ద కొరికితే పాలు విషపూరితమయ్యే ప్రమాదం ఉంటుందని.. అలా కాకుండా పాలు వేడి చేస్తే ఏం కాదని చెప్పారు. ముందస్తుగా యాంటీ రేబిస్ టీకాలు వేయించుకోవటం ఉత్తమమని అంటున్నారు.

• Read More Telangana News And Telugu News