Electrical shock: పదేళ్లైనా పిల్లలు పుట్టలేదని మరదలితో పెళ్లి.. తల్లీబిడ్డలను కాటేసిన కరెంట్

కరెంట్ షాక్‌లో తల్లీ, బిడ్డ ప్రాణాలు కోల్పోయిన విషాద ఘటన మంచిర్యాల(Mancherial) జిల్లాలో చోటుచేసుకుంది. గ్రామస్తుల కథనం మేరకు... కోటపల్లి మండలం బొప్పారం(Bopparam) గ్రామానికి చెందిన జెల్ల సమ్మయ్యకు తులసి అనే మహిళతో వివాహం జరిగింది. పదేళ్లు గడిచినా సంతానం లేకపోవడంతో కుటుంబ సభ్యులు తులసి చెల్లెలు భావన (25)తో రెండో పెళ్లి చేశారు. వీరికి శ్రామన్‌విక అనే (13 నెలలు)పాప ఉంది. చిన్నారి ఆరోగ్యం బాగా లేకపోవడంతో మంగళవారం ఆసుపత్రిలో చికిత్స చేయించుకొని దంపతులు ఇంటికి బయలు దేరారు.

మార్గమధ్యలో ఉన్న పొలానికి నీరు పెడదామని ట్రాన్స్‌ఫార్మర్‌ పక్క నుంచి వెళ్తున్న క్రమంలో నేలపై పడి ఉన్న కరెంట్ తీగ తగిలి తల్లీ బిడ్డ అక్కడికక్కడే ప్రాణాలు కోల్పోయారు. వారిని కాపాడేందుకు ప్రయత్నించి సమ్మయ్య గాయాలతో అపస్మారక స్థితికి చేరుకున్నాడు. కుటుంబసభ్యులు అర్ధరాత్రి గమనించి సమ్మయ్యను ఆసుపత్రికి తరలించారు. భావన ప్రస్తుతం 3 నెలల గర్భిణిగా ఉంది. మృతురాలి తల్లి మల్లక్క ఫిర్యాదు మేరకు పోలీసులు కేసు నమోదు చేసి దర్యాప్తు చేపట్టారు.