లోన్‌ యాప్స్ నిర్వాహకుల బరితెగింపు.. వివాహిత ఫొటోలు మార్ఫింగ్ చేసి.. దారుణం

లోన్ యాప్స్ ఆగడాలకు మరో ప్రాణం బలైంది. లోన్ యాప్స్ నిర్వాహకుల వేధింపులను తట్టుకోలేక ఓ మహిళ ప్రాణం తీసుకున్న ఘటన మంచిర్యాల జిల్లాలో చోటు చేసుకుంది. లోన్ యాప్స్ ఇచ్చే అప్పుల విషయంలో జాగ్రత్తగా ఉండాలని.. ఏమైనా వారితో ఇబ్బందులుంటే నేరుగా తమను ఆశ్రయించవచ్చంటూ పోలీసులు అవగాహన కల్పిస్తున్నా కొందరు మారట్లేదు. గతంలో లోన్ యాప్‌ల బారిన పడి అధిక వడ్డీలు కట్టలేక, బ్లాక్ మెయిలింగ్ తట్టుకోలేక కొందరు ఆత్మహత్యలకు పాల్పడిన సంగతి తెలిసిందే. ఈ క్రమంలోనే పోలీసులు కూడా ఆ యాప్స్‌ వ్యవహారంపై సీరియస్‌గానే ఉన్నారు.

వివరాల్లోకి వెళ్తే.. మంచిర్యాలలోని గోపాలవాడకు చెందిన బొల్లు కల్యాణి అనే వివాహిత లోన్ యాప్ నిర్వహకుల వేధింపులు తాళలేక ఉరేసుకుని ఆత్మహత్య చేసుకుంది. వివిధ లోన్ యాప్‌‌లలో రూ.30 వేల వరకు ఆమె రుణం తీసుకుంది. అయితే గడువులోగా చెల్లించకపోవడంతో ఫోన్‌లో బెదిరించారు ఆ యాప్‌ల నిర్వాహకులు. అంతేకాదు మార్ఫింగ్ చేసి న్యూడ్ ఫొటోలను పంపి డబ్బులు చెల్లించాలంటూ బెదిరింపులకు పాల్పడ్డారు. ఆమె ఫోన్ నుండి యాక్సెస్ చేసుకున్న కాంటాక్ట్ నెంబర్లకు, వాట్సాప్ గ్రూపుల ద్వారా ఆమెను అవమాన పరిచే విధంగా ఆమె గురించి అందరికీ చెడుగా ప్రచారం చేశారు. దీంతో అవమాన భారంతో మూడ్రోజుల కింద కల్యాణి పురుగుల మందు తాగి ఆత్మహత్య యత్నం చేసింది.

మోదీ తెలంగాణ టూర్.. జోష్‌లో బీజేపీ శ్రేణులు.. పర్యటన సక్సెస్ చేసేందుకు సంజయ్ కసరత్తు
ఈ క్రమంలోనే ఆస్పత్రిలో చికిత్స తర్వాత ఇంటికి తీసుకొచ్చారు కుటుంబ సభ్యులు. అయినా యాప్ నిర్వహకుల బెదిరింపులు ఆగకపోవడంతో కల్యాణి ఉరేసుకుని ఆత్మహత్య చేసుకుంది. అయితే కల్యాణి ఆత్మహత్య చేసుకున్నా లోన్‌యాప్‌ నిర్వాహకులు బెదిరింపులు ఆపలేదు. మృతదేహం ఫొటో పంపాలంటూ డిమాండ్ చేశారని బాధితురాలి కుటుంబ సభ్యులు వాపోయారు. లోన్ యాప్‌ల పట్ల అప్రమత్తంగా ఉండాలని, ఇబ్బందులు ఎదురైతే వెంటనే పోలీసులకు ఫిర్యాదు చేయాలని మంచిర్యాల జోన్ ఇన్‌‌చార్జ్ డీసీపీ అఖిల్ మహాజన్ సూచించారు.