ఆదిలాబాద్: యువతి దారుణ హత్య.. ప్రేమ పెళ్లే కారణమా?

ఆదిలాబాద్‌లో ఓ యువతి అనుమానాస్పద మృతి అలజడి రేపుతోంది. నార్నూర్ మండలంలోని నాగల్‌కొండ గ్రామంలో యువతి మెడపై కత్తి గాయంతో రక్తపు మడుగులో మృతి చెంది పడిపోయి ఉంది. ఆత్మహత్య చేసుకుందని కుటుంబసభ్యులు చెబుతున్నారు. అయితే, పరువు హత్య కావచ్చొనే అనుమానాలు వ్యక్తమవుతున్నాయి. సదరు యువతి రాజేశ్వరి కొంత కాలంగా మరో మతానికి చెందిన యువకుడిని ప్రేమిస్తున్నట్లు సమాచారం. తల్లిదండ్రులు అతడిని మర్చిపోవాలని చెప్పినా ప్రేమ వ్యవహారం నడుపుతున్నట్లు తెలుస్తోంది.

కొద్ది రోజుల కిందట ఈ జంట పారిపోయి పెళ్లి కూడా చేసుకున్నట్లు స్థానికులు చెబుతున్నారు. పెద్దల సమక్షంలో కౌన్సిలింగ్ నిర్వహించి ఆ జంటను విడదీసి వేర్వేరుగా ఉంచినట్లు సమాచారం. తల్లిదండ్రుల వద్ద ఉంటున్న యువతి అకస్మాత్తుగా మృతి చెందడం అనుమానాలకు తావిస్తోంది. ఘటనకు సంబంధించిన సమాచారం అందుకున్న పోలీసులు సంఘటనా స్థలానికి వచ్చి మృతదేహాన్ని స్వాధీనం చేసుకున్నారు. కేసు నమోదు చేసుకుని దర్యాప్తు చేస్తున్నారు. రాష్ట్రంలో పరువు హత్యలు కలకలం రేపుతున్న వేళ ఈ యువతి మృతి ఘటన ఆందోళన కలిగిస్తోంది.