Hyderabad in 1940: తులం బంగారం రూ.42.. 100 కేజీల బియ్యం రూ.21..

ఇప్పుడున్న కాలంలో చేతిలో వంద రూపాయలు ఉన్నా ఏ వస్తువూ కొనలేని పరిస్థితి. నిత్యావసరాలతో పాటు అన్ని ధరలు అలా మండిపోతున్నాయి. అలాగని ప్రజలు తమకు కావాల్సింది ఎంత ధరైనా పెట్టి కొనేందుకు వెనుకాడటం లేదు. ఒకప్పుడు ధనిక వర్గాల ఇళ్లల్లో మాత్రమే ఉండే టీవీ, ఫ్రిడ్జ్, సెల్‌ఫోన్లు.. ఇప్పుడు పేదవారికి కూడా కనీస అవసరాలుగా మారిపోయాయి. అయితే స్వాతంత్యానికి ముందు పరిస్థితి ఇలా ఉండేది కాదు. చేతిలో రూపాయి ఉంటే అదే పెద్ద భాగ్యం అన్నట్లుగా అనుకునేవారు. మన ఇంట్లో ఉండే పెద్దలు... తమ చిన్నతనంలో ఉండే ధరలు చెబుతుంటే మనకు భలే ఆసక్తిగా అనిపిస్తుంటుంది.

ముఖ్యంగా భారత్‌కు స్వాతంత్య్రం రాక పూర్వం హైదరాబాద్‌ నగరంలో బంగారం నుంచి నిత్యావసర వస్తువుల వరకు ధరలు ఎలా ఉన్నాయో తెలుసుకోవాలని మీకు అనిపించిందా.. ఈ సమాచారాన్ని మందుముల నరసింగరావు అనే రచయిత ‘50 సంవత్సరాల హైదరాబాద్‌’ అన్న పుస్తకంలో సవివరంగా పేర్కొన్నారు. రెండో ప్రపంచ యుద్ధం వరకు హైదరాబాద్‌లో ధరలు సాధారణంగానే ఉండగా.. యుద్ధం ప్రారంభమైన 16 నెలల తర్వాత ధరలు విపరీతంగా పెరిగాయని ఆయన వివరించారు. ప్రస్తుత ధరలతో పోల్చితే అప్పటి ధరలు ఎంతో తక్కువని అనిపిస్తున్నా... ద్రవ్యోల్బణం పరిగణనలోకి తీసుకుంటే అప్పటి ధరలు ఇప్పటి ధరలతో సరిసమానంగానే భావించాలి.

1940లో హైదరాబాద్‌లో ధరలు ఇలా.. (రూపాయికి 16 అణాలు, సేరుకి 2.1లీటర్లు, గ్యాలన్‌కి 3.78 లీటర్లు)

బంగారం(తులం) - 42 రూపాయల 3 అణాలు
వెండి (తులం) - 12 అణాలు
బియ్యం(100 కేజీలు) - 21 రూపాయల 6 అణాలు
గోధుమల (100 కేజీలు) - 18 రూపాయల 8 అణాలు
జొన్నలు (100 కేజీలు) - 10 రూపాయలు
ఆముదం (40 సేర్లు) - 5 రూపాయల 3 అణాలు
నెయ్యి (40 సేర్లు) - 45 రూపాయలు 11 అణాలు
కిరోసిన్ (4 గ్యాలన్లు) - 5 రూపాయలు