Hyd: నాకు పెళ్లి ఇష్టంలేదు, చదువుకుంటా.. పేరెంట్స్‌పై ఫిర్యాదు చేసిన యువతి

తల్లిదండ్రులు తనకు ఇష్టం లేకున్నా పెళ్లి నిశ్చయం చేశారంటూ హైదరాబాద్‌కు చెందిన ఓ యువతి మానవ హక్కుల కమిషన్ (HRC)ను ఆశ్రయించింది. తనకు పెళ్లి వద్దని, చదువుకుంటానని చెబుతోంది. తల్లిదండ్రులకు తగిన ఆదేశాలు జారీ చేయాలని కోరింది. జీడిమెట్ల పరిధిలోని గాజులరామారం ప్రాంతానికి చెందిన 19 ఏళ్ల యువతి ప్రస్తుతం డిగ్రీ మూడో సంవత్సరం చదువుతోంది. మ్యారేజ్ బ్యూరో ద్వారా ఆమెకు ఇటీవల ఓ సంబంధం వచ్చింది. కుటుంబ సభ్యులు ఆమెకు జూలై 31న నిశ్చితార్థం చేశారు. ఆగస్టు 20న పెళ్లి ముహూర్తం నిర్ణయించారు. తనకు అప్పుడే పెళ్లి వద్దు, చదువుకుంటా అని వేడుకున్నా.. బలవంతంగా తనకు పెళ్లి చేస్తున్నారంటూ ఆ అమ్మాయి ఆవేదన వ్యక్తం చేసింది.

కుటుంబసభ్యులకు తెలియకుండా ఇంటి నుంచి బయటకు వచ్చి ఓ లాయర్ సాయంతో మానవ హక్కుల కమిషన్‌ను ఆశ్రయించింది. మానవ హక్కుల కమిషన్ ఆమె ఫిర్యాదును స్వీకరించింది. గురువారం ఉదయం 11 గంటలకు విచారణకు రావాల్సిందిగా కుటుంబసభ్యులకు ఉత్తర్వులు జారీ చేసింది.