Hyderabad: గణేష్ నిమజ్జనంలో అపశ్రుతి... కూలిన 20 అడుగుల విగ్రహం

భాగ్యనగరంలో గణేష్ నిమజ్జనోత్సవం ఊపందుకుంది. తొమ్మిది రోజుల పాటు పూజలందుకున్న గణపయ్యలు గంగమ్మ ఒడిలో చేరేందుకు క్యూ కడుతున్నారు. ట్యాంక్‌బండ్ సహా నగరంలోని అనేక చెరువుల్లో నిమజ్జనం కోసం అధికారులు ఏర్పాట్లు చేశారు. అయితే గణేశ్ నిమజ్జనం వేళ హైదరాబాద్‌లోని హిమయత్‌‌నగర్‌లో అపశ్రుతి చోటుచేసుకుంది.
రియల్ ఎస్టేట్ జోరు... రూ.10.5లక్షల పలికిన బీరంగూడ గణేశుడి లడ్డూ
కర్మన్‌ఘాట్‌లోని టీకేఆర్‌ కాలేజీ వద్ద నవజీవన్‌ ఫ్రెండ్స్‌ అసోసియేషన్‌ ఆధ్వర్యంలో 20 అడుగుల మట్టి వినాయక విగ్రహాన్ని ఏర్పాటు చేశారు. అయితే నిమజ్జనం కోసం ఆ విగ్రహాన్ని ట్యాంక్‌బండ్‌కు తరలిస్తుండగా హిమాయత్‌ నగర్‌ బజాజ్‌ ఎలక్ట్రానిక్స్‌ వద్ద విగ్రహం ఒక్కసారిగా కూలిపోయింది. దీంతో శోభాయాత్రలో పాల్గొన్నవారు షాకయ్యారు. విగ్రహం కూలిపోవడం అరిష్టమని కొందరు చర్చించుకున్నారు. అయితే విగ్రహాన్ని నిమజ్జనం తరలించే ప్రయత్నంలో సరైన చర్యలు తీసుకోకపోవడం వల్లే ఇలా జరిగిందని కొందరు అంటున్నారు.