హైదరాబాద్‌లో విషాదం.. పతంగి ఎగురవేస్తూ చిన్నారి మృతి

హైదరాబాద్ మియాపూర్లో విషాద ఘటన చోటుచేసుకుంది. పటేల్ చెరువులో పడి ఎనిమిదేళ్ల బాలుడు మృతి చెందాడు. పతంగి ఎగురవేసే క్రమంలో ప్రమాదవశాత్తు నీటి గుంతలో పడి మరణించాడు. దీంతో ఆ కుటుంబంలో విషాదఛాయలు అలుముకున్నాయి. రెండు సంవత్సరాల క్రితమే భర్తను, ఇప్పుడు కుమారుడి పోగొట్టుకున్న బాలుడి తల్లి కన్నీరు మున్నీరుగా విలపించింది.

మియాపూర్‌లో చెరువు సుందరీకరణలో భాగంగా రెండేళ్ల క్రితం చెరువులో పనులు ప్రారంభించారు. ఏడాదిన్నర కాలంగా అర్ధాతంరంగా నిలిపివేశారు. ఇప్పుడు ఆ గుంతలోనే బాలుడు పడి చనిపోవడం స్థానికంగా కలకలం రేపింది. గుత్తేదారుల సమన్వయ లోపం వల్ల దుర్ఘటన చోటు చేసుకుందని స్థానికులు ఆరోపిస్తున్నారు. సమయానికి పనులు పూర్తి చేసి ఉంటే బాలుడు దూరమయ్యేవాడు కాదని ఆరోపిస్తున్నారు.