Man Trapped: బ్యాంక్‌ సిబ్బంది నిర్వాకం.. లాకర్‌లో 18 గంటల పాటు 84 ఏళ్ల వృద్ధుడు

బ్యాంక్‌ సిబ్బంది నిర్వాకంతో ఓ వృద్ధుడు 18 గంటలపాటు బ్యాంకు లాకర్‌ గదిలో చిక్కుకోవాల్సి వచ్చింది. దీంతో ఆ వృద్ధుడు అపస్మారక స్థితికి వెళ్లాడు.. ఈ ఘటన హైదరాబాద్‌లోని జూబ్లీహిల్స్‌ యూనియన్‌ బ్యాంక్‌లో చోటుచేసుకుంది.

వివరాల్లోకి వెళితే.. జూబ్లీహిల్స్‌ రోడ్‌ నంబర్‌ 67లో 84 ఏళ్ల వ్యాపారి కృష్ణారెడ్డి నివాసముంటున్నారు. ఆయన సోమవారం సాయంత్రం 4.20 గంటలకు బ్యాంక్‌ లాకర్‌ పని మీద జూబ్లీహిల్స్‌ చెక్‌పోస్ట్‌లోని యూనియన్‌ బ్యాంక్‌కు వెళ్లారు. అయితే లాకర్‌ గది లోపల కృష్ణారెడ్డి ఉండగానే సిబ్బంది గమనించకుండా దాన్ని మూసివేశారు. దీంతో ఆయన రాత్రంతా అందులోనే గడపాల్సి వచ్చింది.

మరోవైపు కృష్ణారెడ్డి ఇంటికి రాకపోవడంతో ఆయన కుటుంబసభ్యులు తీవ్ర ఆందోళన చెందారు.. ఈక్రమంలోనే పోలీసులకు సైతం ఫిర్యాదు చేశారు. ఇటు సామాజిక మాధ్యమాల్లో ఆయన గురించి పోస్ట్ చేసి మరి వెతకడం మొదలుపెట్టారు.. మరోవైపు మంగళవారం ఉదయం పోలీసులకు అనుమానం వచ్చి సీసీ ఫుటేజీలను పరిశీలించగా బ్యాంక్‌లో‌నే కృష్ణారెడ్డి ఉన్నట్లు గుర్తించారు. దీంతో ఆ బ్యాంకు లాకర్ రూమ్‌లో పరిశీలించగా కృష్ణారెడ్డి అక్కడే అపస్మారక స్థితిలో పడి ఉన్నారు. కాగా కృష్ణారెడ్డికి షుగర్‌తో ఉండటంతో ఆయనకు సపర్యలు చేసి కొంచెం కోలుకోగానే చికిత్స కోసం వెంటనే ఆస్పత్రికి తరలించారు.