Alwal Ganesh Laddu: రూ.46 లక్షలు పలికిన లడ్డూ.. బాలాపూర్ గణేష్ రికార్డు బ్రేక్

వినాయకుడి లడ్డూ వేలంపాట అనగానే అందరికీ బాలాపూర్‌ గుర్తుకొస్తుంది. బాలాపూర్ లడ్డూకు (Balapur Ganesh Laddu) ఉన్న ప్రత్యేక అలాంటిది. గణేష్ లడ్డూ వేలం ప్రారంభించిందే బాలాపూర్‌లో.. 1994లో రూ.450 పలికిన బాలాపూర్ గణేష్ లడ్డూ.. ఏటికేడు తన రికార్డులను తనే బ్రేక్ చేసుకుంటూ లక్షల రూపాయలు పలుకుతోంది. శుక్రవారం జరిగిన వేలంపాటలో ఈ గణనాథుడి లడ్డూ వేలంలో రూ.24 లక్షల 60 వేలు పలికింది. జాతీయ పత్రికల్లోనూ ఈ వార్తను పతాక శీర్షికన ప్రచురించగా.. ఇప్పుడు ఈ రికార్డును బ్రేక్ చేస్తూ హైదరాబాద్ నగరం కొత్త చరిత్రను లిఖించింది. అల్వాల్‌లో (Alwal Ganesh Laddu) నిర్వహించిన వేలంపాటలో వినాయకుడి లడ్డూ ఏకంగా రూ.45,99,999 ధర పలికింది. అంటే బాలాపూర్ గణేష్ లడ్డూకు దాదాపు రెట్టింపు మొత్తం. ఈ ఏడాది తెలుగు రాష్ట్రాల్లో అత్యధిక ధర పలికిన లడ్డూ ఇదే కావడం విశేషం. ఇంతకీ ఈ లడ్డూను ఇంత ధర పెట్టి ఎవరు దక్కించుకున్నారు?

అల్వాల్ పరిధిలోని డెయిరీ ఫామ్ రోడ్ కనాజీగూడలో ఏటా భారీ గణనాథులను ఏర్పాటు చేసి ఘనంగా గణేష్ నవరాత్రులు నిర్వహిస్తున్నారు. ఇక్కడి మరకత శ్రీ లక్ష్మీ గణపతికి ఈసారి కూడా నవరాత్రులు అంగరంగ వైభవంగా నిర్వహించారు. చివరి రోజు లడ్డూ వేలం పాట నిర్వహించారు.

వేలంలో డాక్టర్ వెంకటరావు, గీత ప్రియ దంపతులు లడ్డూను రూ.45,99,999లకు దక్కించుకున్నారు. కిందటి ఏడాది కూడా ఈ దంపతులే వేలంలో గణేష్ లడ్డూను దక్కించుకోవడం విశేషం. ‘ఆ భగవంతుడి కటాక్షంతో మంచి స్థితిలో ఉన్నాం. అందుకే ఈసారి కూడా లడ్డూ వేలం పాటలో పాల్గొన్నా’ అని డాక్టర్ వెంకటరావు దంపతులు తెలిపారు.

బాలాపూర్‌ గణనాథుడి లడ్డూ ధర ఏటికేడు పెరుగుతూ పోతూనే ఉంది. అయితే, కొన్ని చోట్ల ఈ లడ్డూ ధరకంటే అధిక ధర పలికిన సందర్భాలు లేకపోలేదు. కానీ, ఈ స్థాయిలో ధర పలకడం మాత్రం ఇదే తొలిసారి.

బాలాపూర్ లడ్డూ కిందటేడాది కంటే ఈసారి రూ 5.70 లక్షలు అధిక ధర పలికింది. 9 మంది పోటీ పడగా.. గణేష్ ఉత్సవ సమితి సభ్యుడు వంగేటి, టీఆర్‌ఎస్ నేత లక్ష్మారెడ్డి ఈ లడ్డూను దక్కించుకున్నారు.