Super Star Krishna: కృష్ణ మృతికి ప్రముఖుల సంతాపం.. కేసీఆర్, జగన్ ఏమన్నారంటే..?

Super Star Krishna: సూపర్ స్టార్ కృష్ణ మృతి పట్ల మాజీ ఉపరాష్ట్రపతి వెంకయ్యనాయుడు, తెలంగాణ సీఎం కేసీఆర్, ఏపీ సీఎం జగన్, టీడీపీ అధినేత, మాజీ సీఎం చంద్రబాబు సంతాపం ప్రకటించారు. కృష్ణ ప్రయోగాలకు పెద్దపీట వేసి తెలుగు సినిమా స్ధాయిని పెంచారని వెంకయ్యనాయుడు కొనియాడారు. కృష్ణ మరణం చిత్ర పరిశ్రమకు తీరని లోటు అని, సినీ రంగానికి ఐదు దశాబ్ధాల పాటు కృష్ణ సేవలందించారని సీఎం కేసీఆర్ గుర్తు చేశారు. ప్రేక్షకుల హృదయాల్లో కృష్ణ ఎప్పటికీ నిలిచి ఉంటారని తెలిపారు. నటుడిగానే కాకుండా నిర్మాత, దర్శకుడిగా కృష్ణ రాణించారని కేసీఆర్ పేర్కొన్నారు.

కృష్ణ ఆంధ్రా జేమ్స్ బాండ్ గా పేరొందారని, కొన్ని వందల సినిమాల్లో నటించి‌ ఎంతోమంది అభిమానాన్ని పొందారని ఏపీ సీఎం జగన్ తెలిపారు. అల్లూరి సీతారామ రాజు పాత్ర చిరస్థాయిగా నిలిచిపోయిందని, తన కెరీర్‌లో ఎన్నో హిట్‌లు సాధించిన నటుడు సూపర్ స్టార్ కృష్ణ అని జగన్ కొనియాడారు. అటు కృష్ణ మృతికి టీడీపీ అధినేత చంద్రబాబు సంతాపం తెలిపారు. కృష్ణ కుటుంబసభ్యులకు తన ప్రగాఢ సానుభూతి తెలియజేశారు. తెలుగు సినీ పరిశ్రమ ఓ దిగ్గజాన్ని కోల్పోయిందని, తెలుగు సినీ పరిశ్రమలో మంచి మనిషిగా, నిర్మాతల హీరోగా, నటశేఖరుడిగా, సూపర్‌స్టార్ గా పిలిపించుకున్న నటులు, మాజీ ఎంపీ కృష్ణ గారి మరణం దిగ్భ్రాంతికి గరిచేసిందన్నారు. నటుడిగా, దర్శకుడిగా, స్టూడియో అధినేతగా, తెలుగు సినిమాకు తొలి సాంకేతికతను అద్దిన సాహస నిర్మాతగా కృష్ణగారిని చెప్పుకుంటారన్నారు.

టాలీవుడ్ జేమ్స్ బాండ్ గా, విలక్షణ నటునడిగా పేరు తెచ్చుకున్న కృష్ణ మృతి సినీ రంగానికి తీరని లోటు అని చంద్రబాబు తెలిపారు. 'కృష్ణగారి మరణంతో ఒక అద్భుత సినీశకం ముగిసినట్లయింది. ఇటీవలే తల్లిని, ఇప్పుడు తండ్రిని కూడా కోల్పోయిన మహేష్ బాబుకు ఇది తీరని వేదన. ఈ బాధ నుంచి త్వరగా కోలుకునే మనోధైర్యాన్ని ఆయనకు ఇవ్వాలని భగవంతుని కోరుకుంటున్నాను. వారి కుటుంబ సభ్యులకు నా ప్రగాఢ సానుభూతిని తెలియజేస్తున్నాను' అని చంద్రబాబు ప్రకటన విడుదల చేశారు.

అటు కృష్ణ మరణం పట్ల టీపీసీసీ చీఫ్ రేవంత్ రెడ్డి కూడా తన సంతాపం ప్రకటించారు. 'సినీ వినీలాకాశంలో సూపర్ స్టార్‌గా వెలిగి, తెలుగు ప్రజల గుండెల్లో నటశేఖరుడిగా నిలిచిన కృష్ణగారి మరణం దిగ్భ్రాంతి కలిగించింది. ఆయన ఆత్మకు శాంతి చేకూరాలని భగవంతుడిని ప్రార్థిస్తున్నా.. కుటుంబ సభ్యులకు నా ప్రగాఢ సానుభూతి తెలియజేస్తున్నా' అంటూ ట్వీట్ చేశారు.