సంక్రాంతికి బర్డ్ ఫ్లూ టెన్షన్: బాగా పడిపోయిన చికెన్ ధరలు.. కొండెక్కుతున్న మటన్ రేటు

బర్డ్‌ ఫ్లూ వ్యాప్తి భయం మాంసం ధరలపై అధిక ప్రభావాన్ని చూపుతోంది. సంక్రాంతి తర్వాత కనుమ రోజున మాంసం తినే సాంప్రదాయం చాలా చోట్ల ఉండడం.. దీనికి తోడు బర్డ్ ఫ్లూ భయం వేళ కోడి, మేక మాంసం ధరలు విపరీతంగా ప్రభావితమయ్యాయి. ఏటా సంక్రాంతి రోజున హైదరాబాద్‌ నగరంలో భారీగా చికెన్‌ అమ్మకాలు జరుగుతుంటాయి. కానీ ఈసారి బర్డ్‌ ఫ్లూ భయాందోళనల కారణంగా నగర వాసుల్లో దాదాపు 80 శాతం మంది చికెన్‌ కొనుగోలు చేయలేదని వ్యాపారులు ఆందోళన వ్యక్తం చేస్తున్నారు.

ఏపీ, తెలంగాణ రాష్ర్టాల్లో బర్డ్‌ఫ్లూ ఆనవాళ్లు లేవని, చికెన్‌ తినడం వల్ల ఎలాంటి ప్రమాదం లేదని ఒక పక్క ప్రభుత్వం ఎంతగా చెబుతున్నా ప్రజల్లో భయం అంతే ఉంది. బర్డ్‌ ఫ్లూ భయాందోళనల వల్ల చికెన్‌ ధరలు ఏకంగా కిలో రూ.200 నుంచి రూ.150కి పడిపోయింది. అయినా కొనేందుకు వినియోగ దారులు ముందుకు రావడం లేదు.

సాధారణంగా ఒక్క హైదరాబాద్‌లోనే సంక్రాంతి పండగ రోజున దాదాపు 10 లక్షల కిలోల అమ్మకాలు జరుగుతుంటాయని వ్యాపారులు తెలిపారు. వీటితో పాటు నాటుకోళ్ల అమ్మకాలు వేర్వేరుగా ఉంటాయి. కానీ గురువారం సంక్రాంతి రోజున 2 లక్షల కిలోల చికెన్‌ కూడా అమ్మకాలు కూడా జరగలేదని అంచనా వేశారు.

ఆకాశంలో మటన్‌ ధరలు
చికెన్‌ కొనేందుకు జంకుతున్న ప్రజలు మటన్‌ వైపు మళ్లుతున్నారు. దీంతో మేక, గొర్రె మాంసానికి డిమాండ్‌ పెరిగింది. కొందరు వ్యాపారులు ఇప్పటికే ధరలు పెంచేశారు. మటన్‌ ధర కిలోకు రూ.700 వరకూ ఉండగా.. గురువారం పండగ నేపథ్యంలో వ్యాపారులు ఏకంగా కిలో రూ.760 నుంచి రూ.800 వరకు అమ్మకాలు చేస్తున్నారు. హైదరాబాద్‌లో రోజుకు లక్ష నుంచి రెండు లక్షల కిలోల వరకు ఉండే మటన్ సేల్స్.. సంక్రాంతి కారణంగా గురువారం ఒకేరోజు 3.5 లక్షల కేజీల మటన్‌ అమ్మకాలు జరిగినట్టు వ్యాపారులు చెబుతున్నారు.