Revanth Reddy: బండి సంజయ్, నేను ఒకేలా.. కేటీఆరే వేరు.!

దుబ్బాక ఉప ఎన్నిక, జీహెచ్‌ఎంసీ ఎన్నికల్లో బీజేపీ ఘన విజయంతో ఆ పార్టీ రాష్ట్ర అధ్యక్షుడు బండి సంజయ్‌ విపరీతమైన క్రేజ్ సంపాదించుకున్నారు. ఎప్పటికప్పుడు పదునైన వ్యాఖ్యలతో కేసీఆర్ సర్కార్‌పై విరుచుకుపడుతున్న సంజయ్‌.. అందివచ్చిన ఏ అవకాశాన్నీ వదిలిపెట్టడం లేదు. పాతబస్తీలో సర్జికల్ స్ట్రైక్స్ మొదలు తిరుపతి ఉప ఎన్నికలో బైబిల్ పార్టీకి భగవద్గీత పార్టీకి పోటీ అంటూ తనదైన శైలిలో దూసుకుపోతున్నారు.

పార్టీ రాష్ట్ర అధ్యక్షుడి హోదాలో పదునైన వ్యాఖ్యలతో విరుచుకుపడుతున్న బండి సంజయ్‌పై కాంగ్రెస్ ఫైర్‌ బ్రాండ్ రేవంత్ రెడ్డి ఆసక్తికర వ్యాఖ్యలు చేశారు. తెలంగాణలో ప్రస్తుతం నెలకొన్న రాజకీయ పరిస్థితులపై ఆయన మాట్లాడుతూ కేసీఆర్ శకం ముగిసిపోయిందంటూ సంచలన వ్యాఖ్యలు చేశారు. ఈ విషయం తాను చెప్పడం లేదని.. టీఆర్‌ఎస్ మంత్రులు, కీలక నేతలే చెబుతున్నారంటూ బాంబు పేల్చారు.

కేటీఆర్ ముఖ్యమంత్రి పదవికి అర్హుడని శాసనమండలి చైర్మన్ గుత్తా సుఖేందర్‌ రెడ్డి, మంత్రులు శ్రీనివాస్ యాదవ్, గంగుల కమలాకర్, శ్రీనివాస్ గౌడ్, మరికొందరు కీలక నేతలు చేసిన వ్యాఖ్యలను ఆయన గుర్తు చేశారు. ప్రతి మెడిసిన్‌కీ ఎక్స్‌పైరీ డేట్ ఉంటుందన్న ఆయన.. కేసీఆర్‌కి ఎక్స్‌పైరీ డేట్ ముగిసిపోయిందని వ్యాఖ్యానించారు. అందుకే కేటీఆర్ పేరు చెబుతున్నారని అన్నారు.

అదే సందర్భంలో కేటీఆర్‌తో పోలుస్తూ బండి సంజయ్‌పై ఆసక్తికర వ్యాఖ్యలు చేశారు. బండి సంజయ్‌కీ.. తనకి సారూప్యత ఉందని రేవంత్ రెడ్డి అన్నారు. సంజయ్ కార్యకర్త నుంచి కష్టపడి రాష్ట్ర అధ్యక్షుడు అయ్యాడని.. అలాగే తాను కూడా కార్యకర్త నుంచే వచ్చానని అన్నారు. కేటీఆర్ ఎలా వచ్చాడో అందరికీ తెలుసని ఆయన వ్యాఖ్యానించారు. కేసీఆర్ కొడుకునని చెప్పుకుని ఓట్లడిగి ఎన్నికల్లో గెలిచాడని ఎద్దేవా చేశారు.

Also Read: