పుట్టినరోజు నాడు ఇంట్లో జారిపడ్డ డీఎస్.. భుజానికి గాయం

రాజ్యసభ సభ్యుడు ధర్మపురి శ్రీనివాస్‌ సోమవారం హైదరాబాద్‌లోని తన నివాసంలో ప్రమాదానికి గురయ్యారు. నడుస్తున్న సమయంలో కాలు జారి కింద పడటంతో ఎడమ భుజం ఎముక ఫ్రాక్చర్ అయింది. సోమవారం తన పుట్టినరోజు సందర్భంగా డీఎస్ ఇంట్లో పూజ నిర్వహించారు. అనంతరం బయటకు వస్తున్న క్రమంలో ఆయన కాలుజారి పడ్డారు. దీంతో కుటుంబసభ్యులు వెంటనే ఆస్పత్రికి తరలించారు.

ఎడమ భుజం కాస్త చిట్లిందని చెప్పిన డాక్టర్లు కట్టుకట్టి ఇంటికి పంపించారు. నాలుగు రోజుల తర్వాత సర్జరీ చేయనున్నట్లు ఆయన కుమారుడు, నిజామాబాద్ ఎంపీ అర్వింద్ తెలిపారు. ఈ మేరకు సోషల్‌మీడియాలో ఆయన పోస్ట్ పెట్టారు. ఈ సందర్భంగా తన తండ్రితో దిగిన ఫోటోను షేర్ చేశారు. ఈ పోస్టును చూసిన నెటిజన్లు డీఎస్ త్వరగా కోలుకోవాలని కామెంట్లు పెడుతున్నారు.