గేదె అడ్డురావడంతో కింద పడ్డ డాక్టర్.. ఇంతలో లారీ దూసుకొచ్చి.. కోంపల్లిలో విషాదం

హైదరాబాద్‌లోని కోంపల్లిలో ఓ డాక్టర్ రోడ్డు ప్రమాదంలో చనిపోయారు. విధులు ముగించుకొని రాత్రి వేళ ఇంటికి తిరిగి వెళ్తుండగా ఈ ఘోరం జరిగింది. మేడ్చల్‌ జిల్లా గుండ్ల పోచంపల్లికి చెందిన రమేష్‌ (41) సుచిత్రలోని హర్ష హాస్పిటల్‌లో డాక్టర్‌గా పని చేస్తున్నారు. శుక్రవారం కూడా ఎప్పటిలాగే డ్యూటీకి హాజరయ్యారు. సాయంత్రం విధులు ముగించుకొని తన బైక్‌పై ఇంటికి వెళ్తుండగా కొంపల్లి ఫ్లైఓవర్‌పై ఉన్నట్టుండి ఓ గేదె అడ్డురావడంతో దాన్ని ఢీకొని కిందపడిపోయారు. అదే సమయంలో ఫ్లైఓవర్‌పై వెనుక నుంచి వచ్చిన లారీ అతని మీదుగా వెళ్లింది.

దీంతో డాక్టర్ రమేష్‌కు తీవ్ర గాయాలయ్యాయి. ఘటనా స్థలానికి చేరుకున్న పోలీసులు డాక్టర్ రమేష్‌ను ఆసుపత్రికి తరలించారు. అత్యవసర చికిత్స అందించినా ఫలితం లేకుండా పోయింది. అక్కడే చికిత్స పొందుతూ మృతి చెందారు. ఘటనపై కేసు నమోదు చేసుకున్న పేట్‌ బషీరాబాద్‌ పోలీసులు మృత దేహాన్ని పోస్టుమార్టం నిమిత్తం ఉస్మానియా ఆసుపత్రికి తరలించారు.