KCR అహంకారానికి ఇదే నిదర్శనం.. అసెంబ్లీ సమావేశాలపై ఈటల ఆగ్రహం

చరిత్రలో ఎప్పుడూ ఇంత తక్కువ రోజుల సమావేశాలు జరగలేదని.. బీఏసీని సంప్రదించకుండా సమావేశాలను మూడు రోజులకే పరిమితం చేయడంపై ఈటల రాజేందర్ ఆగ్రహం వ్యక్తం చేశారు. కేసీఆర్ అహంకారానికి ఇదే నిదర్శనమని.. మొక్కుబడిగా సమావేశాలు నిర్వహిస్తున్నారని మండిపడ్డారు. 6, 12, 13 తేదీల్లో మాత్రమే సమావేశాలు జరుగుతాయని కేసీఆర్ నోటీసులు పంపారని.. శాసన సభ్యులను గడ్డిపోచ్చల్లాగా అవమానిస్తున్నారని ఈటల విమర్శించారు. గన్‌పార్క్ అమరవీరుల స్థూపం, అసెంబ్లీ ముందున్న సర్ధార్ వల్లభాయ్ పటేల్ విగ్రహం వద్ద రఘునందన్‌తో నివాళులర్పించిన అనంతరం ఆయన మీడియాతో మాట్లాడారు. గతేడాది బడ్జెట్ సమావేశాల సందర్భంగా గవర్నర్ ప్రసంగం లేకపోవడంపై ప్రశ్నించినందుకు తమను సస్పెండ్ చేశారని.. ఈ సమావేశాల్లో ప్రజా సమస్యల గురించి ప్రశ్నించేందుకు వస్తే ఇలా చేశారని రాజేందర్ అసహనం వ్యక్తం చేశారు. వీఆర్ఏ, గ్రామ కార్యదర్శులు, గెస్ట్ లెక్చరర్లు ఆత్మహత్యలకు పాల్పడుతున్నారని.. తెలంగాణ గడ్డపై ఎవరూ సంతోషంగా లేరని ఈటల విమర్శించారు. సెప్టెంబర్ 17న తెలంగాణ భారతదేశంలో విలీనమైన దినాన్ని కేసీఆర్ మర్చిపోయారని.. అమిత్ షా తానే స్వయంగా రంగంలోకి దిగుతాను అనగానే తప్పనిసరి పరిస్థితుల్లో ప్రభుత్వం ముందుకు వచ్చుంటదని ఈటల రాజేందర్ చురకలు అంటించారు.