ఎమ్మెల్యే రాజా సింగ్ శ్రీరామ నవమి వేడుకల్లో అగ్నిప్రమాదం

హైదరాబాద్‌లోని ఓ ప్రాంతంలో నిర్వహించిన శ్రీరామనవమి వేడుకల్లో అపశృతి చోటు చేసుకుంది. గంగాబౌలి ఆకాశ్‌పురి హనుమాన్‌ ఆలయం వద్ద నిర్వహించిన శ్రీరామ నవమి ఉత్సవాల్లో మంటలు అంటుకున్నాయి. గోషామహల్‌ ఎమ్మెల్యే రాజాసింగ్‌ ఆధ్వర్యంలో జరిగిన ఈ ఉత్సవాల్లో అగ్నిప్రమాదం జరిగింది. దీంతో భక్తులు భయంతో ఉరుకులు, పరుగులు పెట్టారు. ప్రతీ ఏటా రాజాసింగ్‌ ఆధ్వర్యంలో గంగాబౌలిలోని ఆకాశ్‌పురి హనుమాన్‌ ఆలయంలో శ్రీరామ నవమి ఉత్సవాలు నిర్వహిస్తున్నారు. బుధవారం రాత్రి 7 గంటల సమయంలో ఉత్సవాలను ప్రారంభించిన ఎమ్మెల్యే టపాసులు కాల్చారు. బీజేపీ కార్యకర్తలు, రాజాసింగ్‌ అభిమానులు పెద్ద ఎత్తున టపాకాయలు కాల్చడంతో ఆలయం సమీపంలోని చెత్త, దేవాలయానికి ఆనుకొని ఉన్న సామగ్రికి మంటలు అంటుకొని దట్టమైన పొగ వ్యాపించింది. స్థానికులు, బీజేపీ కార్యకర్తలు ఫైర్‌ స్టేషన్‌, పోలీసులకు సమాచారం అందించారు. అగ్నిమాపక సిబ్బంది ఫైరింజన్‌తో ఘటనా స్థలానికి చేరుకుని మంటలను అదుపు చేశారు. ఈ ఘటనలో కొద్ది పాటి ఆస్తినష్టం జరిగినట్లు అధికారులు తెలిపారు.