జీహెచ్ఎంసీ మేయర్ పీఠం: టీఆర్ఎస్ పక్కా స్కెచ్.. అమావాస్య రోజైనా కేసీఆర్‌కు లక్కీ!

జీహెచ్ఎంసీ మేయర్ ఎన్నికకు ముహూర్తం ఖరారైంది. ఫిబ్రవరి 11న మేయర్ ఎన్నిక నిర్వహించడం కోసం రాష్ట్ర ఎన్నికల సంఘం శుక్రవారం నోటిఫికేషన్ జారీ చేసింది. ఫిబ్రవరి 11న ఉదయం 11 గంటలకు కొత్తగా ఎన్నికైన కార్పొరేటర్లతో ప్రిసైడింగ్ అధికారి ప్రమాణ స్వీకారం చేయిస్తారు. అనంతరం మధ్యాహ్నం 12.30 గంటలకు కార్పొరేటర్లందరూ కలిసి మేయర్‌ను ఎన్నుకుంటారు. జీహెచ్ఎంసీ ఎన్నికల్లో టీఆర్‌‌ఎస్ 56 స్థానాల్లో, బీజేపీ 48, ఎంఐఎం 44, కాంగ్రెస్ రెండు స్థానాల్లో గెలుపొందాయి. పూర్తి మెజార్టీ రాని క్రమంలో.. సాధారణ మెజార్టీతో మేయర్ పీఠాన్ని దక్కించుకునే దిశగా టీఆర్ఎస్ పావులు కదుపుతోంది.

బీజేపీ, ఎంఐఎం ఉమ్మడిగా అభ్యర్థిని బరిలో దింపితే టీఆర్ఎస్‌ మేయర్ పీఠాన్ని దక్కించుకోవడం సాధ్యపడదు. కానీ ఈ రెండు పార్టీలు పొత్తు పెట్టుకునే అవకాశాల్లేవు. ఆ రోజున ఎంఐఎం సొంతంగా మేయర్ పదవి కోసం పోటీ చేస్తుందా.. లేదంటే తమ కార్పొరేటర్లు మేయర్ ఎన్నిక సమయంలో ఓటింగ్‌లో పాల్గొనకుండా వెళ్లిపోమని కోరుతుందా అనేది ఆసక్తికరంగా మారింది. ఎంఐఎం ఓటింగ్‌లో పాల్గొనకపోతే.. టీఆర్ఎస్‌కు పరోక్షంగా సహకరించినట్లే.

ఈసారి మేయర్ పదవిని జనరల్ మహిళకు కేటాయించారు. దీంతో పార్టీ సీనియర్ నేత కె.కేశవరావు తన కుమార్తె విజయలక్ష్మీకి ఈ పదవి ఇవ్వాలని కోరుతున్నారు. ప్రస్తుత మేయర్ బొంతు రామ్మోహన్ సైతం తన భార్య శ్రీదేవికి ఇవ్వాలని కోరారని సమాచారం. కాగా రెడ్డి సామాజిక వర్గానికి చెందిన మహిళకు మేయర్ పదవిని అప్పగించి.. మున్నూరు కాపు, యాదవ్ లేదా గౌడ సామాజిక వర్గానికి చెందిన ఒకరికి డిప్యూటీ మేయర్ పదవిని కట్టబెడతారనే ప్రచారం జరుగుతోంది. ఈసారి ఇద్దరు డిప్యూటీ మేయర్లు ఉంటారని తెలుస్తోంది. ఎంఐఎంకు డిప్యూటీ మేయర్ పదవిని టీఆర్ఎస్ ఆఫర్ చేయడం లేదని సమాచారం.

హిందువులు శుభప్రదం కాదని భావించే అమావాస్య రోజున జీహెచ్ఎంసీ మేయర్ ఎన్నిక జరుగుతుండటం ప్రాధాన్యం సంతరించుకుంది. కానీ టీఆర్ఎస్ కార్పొరేటర్లు (56 = 5+6 =11 = 2), ఎన్నిక జరిగే తేదీ (ఫిబ్రవరి 11 = 2 + 11 =13 = 4) కలిపితే కేసీఆర్ లక్కీ నంబర్ 6 వస్తుండటం గమనార్హం.