TS: మరో 3 రోజులూ భారీ వర్షాలు.. మూసీకి పెరిగిన వరద

హైదరాబాద్ సహా తెలంగాణలోని పలు ప్రాంతాల్లో వరుసగా మూడో రోజు వర్షాలు (Telangana Rain) కురిశాయి. కొన్ని చోట్ల భారీ వర్షాలు కురిశాయి. హైదరాబాద్ నగరంలో బుధవారం (సెప్టెంబర్ 7) మధ్యాహ్నం నుంచి విడతల వారీగా దాదాపు అన్ని ప్రాంతాల్లో వర్షం కురిసింది. రోడ్లపై భారీగా వరద నీరు నిలిచిపోయింది. పలు ప్రాంతాల్లో కిలోమీటర్ల మేర ట్రాఫిక్‌ నిలిచిపోయింది. వాహనదారులు, పాదచారులు తీవ్ర ఇబ్బందులు పడ్డారు. మూడు రోజులుగా కురుస్తున్న వానలతో అటు.. మూసీ నదిలో మరోసారి వరద ప్రవాహం పెరిగింది. ముసారాంబాగ్‌ వంతెన పైనుంచి వరద నీరు ప్రవహిస్తోంది. దీంతో ట్రాఫిక్‌ పోలీసులు బ్రిడ్జి పైనుంచి రాకపోకలు నిలిపివేశారు. ఫలితంగా చాదర్‌ఘాట్ నుంచి నల్గొండ క్రాస్ రోడ్డు వరకు ట్రాఫిక్‌ నిలిచిపోయింది.

జూబ్లీ హిల్స్, బంజారాహిల్స్, ఖైరతాబాద్‌, అమీర్‌పేట, సోమాజిగూడ, పంజాగుట్ట, లక్డీకాపూల్‌, మెహదీపట్నం, కూకట్‌పల్లి, నిజాంపేట్‌లో భారీ వర్షం కురిసింది. మాదాపూర్‌, కొండాపూర్‌, కొత్తగూడ, గచ్చిబౌలి, రాయదుర్గం, రామ్ నగర్, అంబర్‌పేట, ఉప్పల్, కోఠి, గోషామహల్‌, బహదూర్‌పుర, చార్మినార్‌ తదితర ప్రాంతాల్లో వర్షం కురిసింది.

మరోవైపు.. ఉపరితల ఆవర్తన ప్రభావంతో రాష్ట్రంలో విస్తారంగా వర్షాలు కురుస్తున్నాయని హైదరాబాద్ వాతావరణ కేంద్రం డైరెక్టర్ నాగరత్న తెలిపారు. రానున్న మూడు రోజుల పాటు వర్షాలు కురిసే అవకాశం ఉందని ఆమె చెప్పారు. పలు ప్రాంతాల్లో ఒక మోస్తరు నుంచి భారీ వర్షాలు కురుస్తాయని వెల్లడించారు. ఉమ్మడి ఆదిలాబాద్, కరీంనగర్, వరంగల్ జిల్లాలకు ఆరెంజ్ హెచ్చరికలు జారీ చేసినట్లు ఆమె తెలిపారు.