Hyd: వణికిస్తున్న వాన.. పలు కాలనీలకు ముంపు ముప్పు

హైదరాబాద్ నగరంలో కుండపోత వాన కురుస్తోంది. గురువారం (సెప్టెంబర్ 8) రాత్రి 8.30 గంటలకు మొదలైన వాన గంటకు పైగా ఎడతెరిపి లేకుండా కురిసిన వానతో నగరంలోని రోడ్లన్నీ జలమయం అయ్యాయి. లోతట్టు ప్రాంతాల్లో భారీగా వరద నీరు చేరింది. రోడ్ల మీదకి భారీగా వరద నీరు చేరడంతో వాహనాదారులు తీవ్ర ఇబ్బందులు పడుతున్నారు. పలు చోట్ల కిలోమీటర్ల మేర ట్రాఫిక్ నిలిచిపోయింది. జీహెచ్‌ఎంసీ సిబ్బంది, డిజాస్టర్ రెస్పాన్స్ ఫోర్స్ (DRF) రంగంలోకి దిగి చర్యలు చేపట్టారు. రోడ్లపై నిలిచిన వరద నీటిని తొలగించే ప్రయత్నం చేస్తున్నారు. సాయంత్రం కురిసిన వానతో ఇప్పటికే పలు ప్రాంతాలు జలమయం కాగా.. మళ్లీ కురుస్తున్న వర్షం నగరవాసులను వణికిస్తోంది.

అత్యవసరమైతే గానీ ప్రజలెవరూ బయటికి రావద్దని అధికారులు హెచ్చరికలు జారీ చేశారు. నగర వ్యాప్తంగా ఉరుములు, మెరుపులతో కూడిన వర్షం కురుస్తోంది. మరో గంటపాటు వర్షం పడే అవకాశం ఉందని వాతావరణ శాఖ అధికారులు తెలిపారు. 19 మాన్సూన్ రెస్పాన్స్ బృందాలను జీహెచ్‌ఎంసీ అధికారులు రంగంలోకి దించారు.

పంజాగుట్ట - లక్డీకాపూల్ మార్గంలో భారీగా ట్రాఫిక్ జామ్ అయింది. మాసబ్ ట్యాంక్ నుంచి మెహిదీపట్నం వరకు ట్రాఫిక్ నిలిచిపోయింది. జూబ్లీహిల్స్, బంజారాహిల్స్, పంజాగుట్ట, అమీర్‌పేట, ఎర్రగడ్డ, కూకట్‌పల్లి, మేడ్చల్, కుత్బుల్లాపూర్, నేరేడ్మెట్, సైనిక్‌పురి, ఏఎస్ రావు నగర్, కాప్రా, చెర్లపల్లి, దమ్మాయిగూడ, బాలాజీ నగర్, కీసర, ఘట్కేసర్, నారపల్లి, మేడిపల్లి, బోడుప్పల్, చెంగిచెర్ల తదితర ప్రాంతాలలో భారీ వర్షం కురుస్తోంది.

కాప్రా చెరువు నుంచి జమ్మిగడ్డ సోనియా గాంధీ నగర్ మీదుగా నాలా ప్రమాదకరంగా ప్రవహిస్తోంది. లోతట్టు ప్రాంత ప్రజలు అప్రమత్తంగా ఉండాలని అధికారులు హెచ్చరించారు. నాలా ఉధృతంగా ప్రవహిస్తే కాలనీలోని ఇళ్లలోకి నీరు చేరే ముప్పు ఉంది.