రజాకార్ల అరాచకాలను ఎలా మర్చిపోగలం: గవర్నర్ తమిళిసై

Tamilisai Soundararajan: సెప్టెంబర్ 17వ తేదీన తెలంగాణ విమోచన దినోత్సవం జరుపుకోవాలని గవర్నర్ తమిళిసై రాష్ట్ర ప్రజలకు పిలుపునిచ్చారు. నిజాం పాలనలో హైదరాబాద్ రాష్ట్ర ప్రజలపై రజాకార్ల అరాచకాలను మర్చిపోలేమని వ్యాఖ్యానించారు. నిజాం పాలన నుంచి విమోచనం పొందిన రోజు సెప్టెంబర్ 17 అని వివరించారు. సికింద్రాబాద్‌లోని పరేడ్ గ్రౌండ్స్‌ (Parade Ground)లో హైదరాబాద్ లిబరేషన్ మూవ్‌మెంట్‌పై ఫోటో, ఆర్ట్ ఎగ్జిబిషన్‌ను ఏర్పాటు చేశారు. దీన్ని ప్రారంభించిన సందర్భంగా.. గవర్నర్ మాట్లాడారు. రజాకార్లు, నిజాం చెర నుంచి బయటపడేందుకు.. అనేక మంది ప్రాణత్యాగం చేశారని.. గవర్నర్ తమిళిసై వ్యాఖ్యానించారు. ఎన్నో సంఘటనలు వాటిని మనకు తెలియజేస్తున్నాయని వివరించారు. ఎందరో మహనీయులు రక్తాలను చిందించి.. తెలంగాణను విమోచనం వైపు నడిపించారని కీలక వ్యాఖ్యలు చేశారు. విమోచనం కోసం హైదరాబాద్ (Hyderabad) స్టేట్ ప్రజలు చేసిన పోరాటాలను తెలుసుకున్నప్పుడు.. తాను నిద్ర లేని రాత్రి గడిపానని చెప్పారు. బైరాన్‌పల్లిలో 90 మందిని చంపేశారని.. రజాకార్ల అరాచకాలను ఎలా మర్చిపోగలమని అన్నారు.