Rajiv Swagruha: రాజీవ్‌ స్వగృహ 3 బీహెచ్‌కే ఇళ్లకు ఫుల్ డిమాండ్.. అంత తక్కువ ధరకే వస్తుండటంతో..

రాజీవ్ స్వగృహ ఇళ్లకు మంచి స్పందన లభిస్తోంది. తక్కువ ధరకే ఫ్లాట్లు అందుబాటులో ఉండటంతో ప్రజల నుంచి డిమాండ్ ఎక్కువగా ఉంటోంది. ముఖ్యంగా ఎక్కువ మంది 3 బీహెచ్‌కే డీలక్స్‌, 3 బీహెచ్‌కే ఫ్లాట్లుకే ఎక్కువ శాతం మొగ్గు చూపుతున్నారు. బండ్లగూడ వద్ద అపార్ట్‌మెంట్లలో ఉన్న ఫ్లాట్లకు భారీగా దరఖాస్తులు వస్తున్నాయి. బండ్లగూడలో ట్రిపుల్ బెడ్రూం డీలక్స్ ఫ్లాట్ రూ.48,15,000కి అందుబాటులో ఉంది. ఇదే ప్రాంతంలో బయట ఫ్లాట్ కొనాలంటే మాత్రం రూ.75 లక్షలపైనే ఉంది. ఈ నేపథ్యంలోనే దరఖాస్తు చేసుకునేందుకు ప్రజలు ముందుకొస్తున్నట్లు తెలుస్తోంది.

జీహెచ్ఎంసీ పరిధిలోని బండ్లగూడతో పాటు పోచారంలోని రాజీవ్‌ స్వగృహ ఫ్లాట్ల అమ్మకానికి ఈ నెల 11న హెచ్‌ఎండీఏ నోటిఫికేషన్‌ విడుదల చేసిన సంగతి తెలిసిందే. వచ్చే నెల 14వ తేదీ వరకు దరఖాస్తు చేసుకునే అవకాశం కల్పించింది. ఇప్పటివరకు 14,150 దరఖాస్తులు వచ్చాయి. వాటిలో 10 వేలపైనే బండ్లగూడలో ఫ్లాట్ల కోసం దరఖాస్తు చేసుకున్నారని అధికారులు చెబుతున్నారు.

Telangana Covid : తెలంగాణలో మరో కరోనా కొత్త వేరియెంట్ కేసు.. దేశంలోనే తొలిసారి నమోదు
ఇకపోతే బండ్లగూడలో 1,501, పోచారంలో 1,470 ఫ్లాట్లను అమ్మకానికి పెట్టారు. బండ్లగూడలో పూర్తయిన 419 ఫ్లాట్లు చదరపు అడుగుకు రూ.3 వేలుగా, సెమీ ఫినిష్‌డ్‌గా ఉన్న 1,082 ఫ్లాట్లను చదరపు అడుగు రూ.2,750గా విక్రయించాలని ప్రభుత్వం నిర్ణయించింది. ఇటు పోచారంలో పూర్తయిన 1,328 ఫ్లాట్లను చదరపు అడుగుకు రూ.2,500 చొప్పున, అసంపూర్తిగా ఉన్న 142 ఫ్లాట్లకు చదరపు అడుగుకు రూ.2,250గా ధర నిర్ణయించారు. ప్రస్తుతం బండ్లగూడలో 3 బీహెచ్‌కే డీలక్స్‌ 345, 3 బీహెచ్‌కే 444, 2 బీహెచ్‌కేవీ 712 అందుబాటులో ఉన్నాయి. పోచారంలో 3 బీహెచ్‌కేవీ 91, మరో 53 వరకు 3 బీహెచ్‌కే, 2 బీహెచ్‌కేవీ 884, సింగిల్‌ బెడ్రూం ఇళ్లు 442 విక్రయించనున్నారు.