Rajiv Swagruha: రాజీవ్ స్వగృహ ఫ్లాట్లకు భారీ స్పందన.. మొత్తం 40 వేల దరఖాస్తులు

Rajiv Swagruha Flats Applications | Hyderabad: రాష్ట్ర రాజధాని హైదరాబాద్ పరిధిలోని బండ్లగూడ, పోచారంలో అమ్మకానికి ఉంచిన రాజీవ్ స్వగృహ ఫ్లాట్లకు మంచి స్పందన వచ్చింది. నిన్నటి (మంగళవారం) తో దరఖాస్తుల గడువు ముగిసింది. ఈ క్రమంలోనే మంగళవారం సాయంత్రం 5 గంటల వరకు 39,082 అప్లికేషన్లు వచ్చినట్లు అధికారులు తెలిపారు. గడువు సమయం ముగిసేలోపు 40 వేల వరకు దరఖాస్తులు వచ్చాయి. మొత్తంగా చివరి రోజు 4 వేలకు పైగా దరఖాస్తులు వచ్చినట్లు సమాచారం.

బండ్లగూడలో 2,246, పోచారంలో 1,470 ఫ్లాట్లు వేలానికి పెట్టగా.. బండ్లగూడలోని ఫ్లాట్లకు 29 వేల దరఖాస్తులు వచ్చినట్లు అధికారులు తెలిపారు. నాగోల్ మెట్రో నుంచి తక్కువ దూరంలో ఉండటం, మార్కెట్ రేట్లతో పోలిస్తే చాలా తక్కువ ధరలకే సింగిల్, డబుల్, ట్రిపుల్, ట్రిపుల్ డీలక్స్ ఫ్లాట్లు అందుబాటులో ఉండటంతో కొనుగోలుదారులు బండ్లగూడ వైపే మొగ్గుచూపారు. ఈ ఫ్లాట్ల కేటాయింపుల కోసం ఈనెల 22న లాటరీ తీయనున్నారు.

ధరలు ఎంతంటే?
ఇకపోతే ఈ ఫ్లాట్ల అమ్మకం ద్వారా రూ.900 కోట్ల ఆదాయం సర్కార్‌కు వస్తుందని అధికారులు అంచనా వేస్తున్నారు. దరఖాస్తుల రూపంలోనే రూ.3.5 కోట్లు రాష్ట్ర ఖజానాకు చేరాయి. ఒక్కో చదరపు అడుగుకు రూ.3 వేలు, రూ.2,750 ధర ఖరారు చేశారు. మార్కెట్ రేటుతో పోలిస్తే రాజీవ్ స్వగృహ ధరలు చాలా తక్కువగా ఉన్నాయి. సింగిల్ బెడ్రూం రూ.18 లక్షలు, డబుల్ బెడ్రూం రూ.35 లక్షలు, ట్రిపుల్ బెడ్రూం ఫ్లాట్లు రూ.50 లక్షల లోపే వస్తుండటంతో భారీ స్పందన వచ్చింది.