ATMలో మనీ డిపాజిట్ చేసినట్లు నటించి.. కోటి 30 లక్షలు కొట్టేసిన కేటుగాళ్లు!

ఉపాధి కల్పించే కంపెనీకే కేటుగాళ్లు సున్నం పెట్టే ప్రయత్నం చేశారు. ఓ బ్యాంకుకు చెందిన ఏటీఎంలలో నగదు నింపే కంపెనీ చేసే ఉద్యోగులు అత్యాశకు పోయారు. ఏటీఎంలలో డిపాజిట్ చేయాల్సిన రూ.1.30 కోట్ల నగదును పక్క దారి పట్టించారు. ఈ విషయం గ్రహించిన కంపెనీ యాజమాన్యం హైదరాబాద్ సీసీఎస్ పోలీసులకు ఫిర్యాదు చేసింది. కేసు నమోదు చేసిన పోలీసులు దర్యాప్తు ప్రారంభించారు.

సికింద్రాబాద్‌కు చెందిన కృష్ణ, మహబూబాబాద్‌కు చెందిన రాజేష్ అనే ఇద్దరు వ్యక్తులు ఈ మోసానికి పాల్పడినట్లు పోలీసులు గుర్తించారు. వారిని అరెస్టు చేసి నాంపల్లి కోర్టులో హాజరుపర్చారు. వీరు దగ్గర్నుంచి రూ.16 లక్షల నగదును పోలీసులు స్వాధీనం చేసుకున్నారు. రాజేష్ గతంలో ఇదే తరహా మోసం కేసులో జైలుకు వెళ్లొచ్చాడని తెలుస్తోంది.