మళ్లీ నిలిచిపోయిన మెట్రో సేవలు.. అప్రమత్తమైన అధికారులు

హైదరాబాద్‌ మెట్రో రైలు నిర్వహణలో తరచుగా సాంకేతిక సమస్యలు తలెత్తుతున్న సంగతి తెలిసిందే. మంగళవారం నాగోల్‌ స్టేషన్‌ డేటా కంట్రోల్‌ సిస్టమ్‌లో సాంకేతిక సమస్య తలెత్తడంతో అన్ని మెట్రో రూట్లలో రైళ్లు నిలిచిపోయాయి. దీంతో ప్రయాణికులు తీవ్ర ఇబ్బందులు పడుతున్నారు. మియాపూర్‌ నుంచి ఎల్బీ నగర్‌ వైపు వెళ్తున్న రైలులోనూ సాంకేతిక లోపం తలెత్తగా గాంధీభవన్‌ స్టేషన్‌లో మెట్రో నిలిచిపోయింది. మరోవైపు ముసారాంబాగ్‌లోనూ 15 నిమిషాలకు పైగా మెట్రో సేవలు ఆగిపోయాయి.

దీంతో అప్రమత్తమైన మెట్రో అధికారులు రైళ్లను పునరుద్ధరించేందుకు మెట్రో అధికారులు ప్రయత్నిస్తున్నారు. సాంకేతిక సమస్యల కారణంగా జనవరి 21న జూబ్లీహిల్స్‌ రోడ్‌ నంబర్‌ 5 వద్ద మెట్రో రైలు 15 నిమిషాల పాటు నిలిచిపోయిన విషయం తెలిసిందే. సిగ్నలింగ్‌ లోపాలు, సాంకేతిక సమస్యలతో తరచూ మెట్రో రైళ్లు ఆగిపోతున్నాయి. తర్వాత కాసేపటికే అధికారులు సమస్యను పరిష్కరిస్తున్నారు.