హైదరాబాద్‌: గజదొంగ మంత్రి శంకర్ అరెస్టు.. ఇతని గురించి తెలిస్తే మైండ్ బ్లాక్!

నలభై ఒకటేళ్లుగా వరుసగా దొంగతనాలకు పాల్పడుతున్న వ్యక్తిని వ్యక్తిని హైదరాబాద్ పోలీసులు మళ్లీ అరెస్టు చేశారు. ఈనెల 4న చర్లపల్లి జైలు నుంచి బయటకు వచ్చిన ఇతను అబ్దుల్‌ లతీఫ్‌ఖాన్‌(27), మహ్మద్‌ ఇంతియాజ్‌(21), మహ్మద్‌ మజీద్‌(23)లతో కలిసి హైదరాబాద్‌, రాచకొండ కమిషనరేట్‌ల పరిధిలో ఆరు దొంగతనాలు చేశాడు. మిగతా ముగ్గురూ పలు కేసుల్లో నిందితులే. వీరి వద్ద రూ.12 లక్షల నగదు, వెయ్యి గ్రాముల వెండి, రెండు బైకులను స్వాధీనం చేసుకున్నారు.

ఇతని పేరు మంత్రి శంకర్. మంత్రి అనేది ఇంటిపేరు. ఇతనికి దొంగతనాలే వృత్తి. వయసు 60 ఏళ్లు. గత 40 ఏళ్లుగా దొంగతనాలు చేస్తూ ఇప్పటికి 250 చోరీలు చేశాడు. 209 కేసుల్లో శిక్ష అనుభవించాడు. తన జీవితంలో 20 ఏళ్లకు పైగా జైలులోనే గడిపాడు. అయినా ఇతని బుద్ధిమారలేదు. 10 సెకన్లలో ఏ ఇంటి తాళాన్నయినా బద్దలుకొట్టేయగల నేర్పు ఇతని సొంతం. ఇటీవల జైలు నుంచి విడుదలైన వెంటనే తన ముఠాతో కలిసి చకచకా ఆరు దొంగతనాలకు పాల్పడి మళ్లీ పోలీసులకు దొరికిపోయాడు. శుక్రవారం బషీర్‌బాగ్‌ పోలీస్‌ కమిషనరేట్‌ కార్యాలయంలో సీపీ అంజనీకుమార్‌ ఇతని గురించి వివరాలు వెల్లడించారు.

సీపీ వెల్లడించిన వివరాల ప్రకారం.. మంత్రి శంకర్‌ అలియాస్‌ శివన్న చిలకలగూడకు చెందిన వ్యక్తి. 1979లో సైకిళ్ల దొంగతనంతో ఇతని నేర చరిత్ర మొదలైంది. క్రమేణా గజదొంగగా మారాడు. జైల్లో పరిచయమైన నేరస్తులను అసిస్టెంట్లుగా ఏర్పాటు చేసుకునేవాడు. పగలు కాలనీల్లో రెక్కీ నిర్వహిస్తాడు. అర్ధరాత్రి మిగతావారితో కలిసి వాహనంలో వెళ్లి.. వారిని దూరంగా ఉంచి ఒక్కడే నాలుగైదు ఇళ్లలో చోరీలు చేసేస్తాడు. ఇతను మూడంతస్తుల పైనుంచి కిందకు దూకి తేలికగా తప్పించుకోగలడు. ఇతనికి పమేరియన్‌ జాతి కుక్కలంటే భయం. ప్రస్తుతం ముగ్గురు భార్యలు, ఆరుగురు పిల్లలు ఉన్నట్టు సమాచారం. ఎన్నోసార్లు జైలులో పెట్టినా అతని బుద్ధి మారకపోతుండడంతో హైదరాబాద్‌ పోలీసులు నాలుగోసారి శంకర్‌పై పీడీ యాక్ట్‌ అమలు చేసేందుకు సిద్ధమవుతున్నారు.

ఇవి కూడా చదవండి: