పాతబస్తీలో ఫ్లాగ్ మార్చ్ నిర్వహించిన పోలీసులు

హైదరాబాద్: పాతబస్తీలో పోలీసులు ఫ్లాగ్ మార్చ్ నిర్వహించారు. ఛత్రినాక పోలీస్ స్టేషన్ పరిధిలో సౌత్ జోన్ పోలీసులు ఈ ఫ్లాగ్ మార్చ్ నిర్వహించారు. 150 మంది పోలీసులు ఫ్లాగ్ మార్చ్‌లో పాల్గొన్నారు. వినాయక చవితి ఉత్సవాల్లో భాగంగా ఫలక్‌నుమా డివిజన్‌లో 600 గణేష్ విగ్రహాలను ఏర్పాటు చేశారు. ఈ సందర్భంగా ఎలాంటి అవాంఛనీయ సంఘటనలకు తావు లేకుండా ఫ్లాగ్ మార్చ్ చేపట్టినట్లు పోలీసు అధికారులు తెలిపారు. ప్రజలు పండగలను శాంతియుతంగా నిర్వహించుకోవాలని, వదంతులను నమ్మొద్దని సూచించారు. వదంతులను వ్యాప్తి చేస్తే కఠిన చర్యలు తీసుకుంటామని హెచ్చరించారు.

సోషల్ మీడియాలో ఎలాంటి వివాదాస్పద పోస్టులు పెట్టరాదని ఏసీపీ జహంగీర్ హెచ్చరించారు. సోషల్ మీడియాపై ప్రత్యేక నిఘా పెట్టినట్లు తెలిపారు. ఈ కార్యక్రమంలో ఫలక్‌నుమా ఏసీపీ షేక్ జహంగీర్‌తో పాటు సౌత్ జోన్ పోలీసులు, ఇతర అధికారులు పాల్గొన్నారు.