హైదరాబాద్‌లో గుడ్లగూబల అమ్మకాలు.. ధరెంతో తెలిస్తే షాక్

హైదరాబాద్‌ సౌత్‌ జోన్‌ టాస్క్ ఫోర్స్‌ పోలీసులు 15 అప్పుడే పుట్టిన గుడ్లగూబలను పట్టుకున్నారు. అక్రమంగా ఈ గుడ్ల గూబలు, జంతువులను ఇతరులకు విక్రయిస్తున్నట్లుగా సమాచారం రావడంతో వెంటనే సౌత్ జోన్ ఇన్స్‌పెక్టర్, సౌత్ జోన్ టాస్క్ ఫోర్స్ అడిషనల్ డీజీపీ చక్రవర్తి ఆదేశాల మేరకు దాడులు చేశారు. ఈ దాడులలో ఒక వ్యక్తిని అరెస్టు చేసి 15 అప్పుడే పుట్టిన గుడ్లగూబలను స్వాధీనం చేసుకున్నారు.

హృదయం ఆకారంలో ముఖం ఉండే ఈ గుడ్లగూబలకు మార్కెట్‌లో మంచి ధర పలుకుతోందని అధికారులు తెలిపారు. హైదరాబాద్‌లోని ఫలక్‌నుమాలో నివాసం ఉంటున్న కమ్రాన్‌ అలీ ఫరూకీ అలియాస్‌ ఇమ్రాన్‌ అలీ (22) ఈ గుడ్ల గూబలు, జంతువులను పట్టుకొచ్చి ఇతరులకు విక్రయిస్తూ ఉంటాడు. ఈ విధంగా అలీ గుడ్లగూబలు, ఇతర జంతువులను కావాలని అడిగినవారికి వాటిని వేటాడి ఎక్కువ రేటుకు విక్రయించేవాడు.

సౌత్ జోన్ టాస్క్ ఫోర్స్ పోలీసులు దాడులు చేసి అలీని అరెస్టు చేసి అతని వద్ద ఉన్న 15 శిశు గుడ్లగూబలను రక్షించి వీటిని అటవీ శాఖకు అప్పగించారు. ఈ గుడ్లగూబల ధర దాని రకాన్ని బట్టి ఒక్కొక్కటి రూ.10 వేల నుంచి లక్ష రూపాయల వరకు ఉంటుందని అధికారులు వెల్లడించారు. అరెస్టు చేసిన వ్యక్తిని పోలీసులకు అప్పగించారు.