HYD: పార్టీలో మునిగిన ఆస్పత్రి సిబ్బంది.. వైద్యం అందక శిశువు మృతి

హైదరాబాద్‌లోని ఓ ప్రైవేటు ఆస్పత్రిలో దారుణం చోటు చేసుకుంది. ప్రసవం కోసం వచ్చిన గర్భిణిని ఆస్పత్రి సిబ్బంది పట్టించుకోకుండా నిర్లక్ష్యం చేయడంతో పుట్టిన పసికందు మరణించింది. దీనిపై బాధిత కుటుంబ సభ్యులు ఆస్పత్రి సిబ్బంది తీరుపై మండిపడ్డారు.

వివరాల్లోకి వెళ్తే.. చాదర్ఘాట్‌లోని ఓ ప్రైవేట్ ఆసుపత్రి సిబ్బంది నిర్వాకం తాజాగా వెలుగు చూసింది. ఆస్పత్రి బిల్డింగ్పై ఓ వివాహానికి ముందస్తు పార్టీ నిర్వహించారు. ఈ వేడుకల్లో ఆస్పత్రి సిబ్బంది మునిగిపోయింది. డీజే సిస్టం పెట్టుకొని ఆటపాటలతో డ్యాన్సులు చేస్తూ వేడుకలు చేసుకుంది. ఇటు ప్రసవం కోసం వచ్చిన గర్భిణిని ఎవరూ పట్టించుకోలేదు. మహిళ పరిస్థితి విషమం అని తెలిసినా వైద్యులు పార్టీలో మునిగి తేలారు. దీంతో సరైన సమయంలో గర్భిణికి వైద్యం అందక శిశువు మృతి చెందింది. ఈ క్రమంలోనే ఆస్పత్రి సిబ్బందిపై బాధిత కుటుంబ సభ్యులు తీవ్ర స్థాయిలో మండిపడ్డారు. ఆస్పత్రిపై చర్యలు తీసుకోవాలంటూ డిమాండ్ చేశారు.