బెట్టింగ్ రాజు... స్నేహితురాలితో కలిసి ఆమె ఇంటికే కన్నం, చివరికి

బెట్టింగ్‌లకు అలవాటు పడి ఓ యువకుడు తన చిన్ననాటి స్నేహితురాలితో కలిసి ఆమె సోదరి ఇంట్లో చోరీకి పాల్పడిన ఘటన హైదరాబాద్ జూబ్లీహిల్స్‌ పోలీస్‌స్టేషన్‌ పరిధిలో వెలుగులోకి వచ్చింది. మహబూబాబాద్‌ జిల్లా పెద్దవంగర మండలానికి చెందిన చింత రాజు కార్మికనగర్‌లో నివసిస్తున్నాడు. అదే కాలనీలో ఆయనతో చిన్నప్పుడు కలిసి చదువుకున్న జ్యోతి ఉంటోంది. రెండు కుటుంబాల మధ్య స్నేహం ఉంది.

Also Read: హైదరాబాద్‌లో సవతి తండ్రి నీచం... కూతురిని బెదిరించి మూడేళ్లుగా అఘాయిత్యం

ఓ ఫార్మా సంస్థలో పనిచేసే రాజు ఆన్‌లైన్‌ బెట్టింగ్‌లకు అలవాటుపడ్డాడు. వచ్చే జీతంతో పాటు అప్పులు చేసి మరీ బెట్టింగులు కట్టి నష్టపోయాడు. ఆయన తల్లికి కిడ్నీ సంబంధిత సమస్య ఉండటంతో డయాలసిస్‌ చేయించాల్సి వచ్చేది. ఈ నేపథ్యంలోనే తల్లి చికిత్స కోసం డబ్బులు అవసరమని స్నేహితురాలిని నమ్మించాడు. జ్యోతి ఇంటి పక్కనే ఉండే ఆమె సోదరి విజయ, తల్లి అనసూయతో కలిసి పశ్చిమగోదావరి జిల్లా తణుకు ప్రాంతానికి వెళ్లారు. ఇదే అదనుగా రాజు, జ్యోతి కలిసి వారి ఇంటి తాళం పగులగొట్టి బీరువా తాళాలు తీసి బంగారు ఆభరణాలు దొంగిలించారు.

Also Read: లవ్ రిజెక్ట్ చేసిన యువతి... పగబట్టి నీచానికి పాల్పడిన యువకుడు

ఆభరణాలను రాజు తనఖా పెట్టి సుమారు రూ.4లక్షల రుణం తీసుకుని ఆ డబ్బునూ బెట్టింగ్‌ల్లో పోగొట్టుకున్నాడు. వారం క్రితం తిరిగొచ్చిన విజయ ఇంట్లో చోరీ జరిగిందని గమనించి జూబ్లీహిల్స్ పోలీసులకు ఫిర్యాదు చేశారు. కేసు నమోదు చేసిన పోలీసులు విచారణ చేపట్టి నిందితులను గుర్తించారు. రాజును అరెస్ట్‌ చేసి 25 తులాల బంగారు ఆభరణాలను స్వాధీనం చేసుకోగా.. జ్యోతి పరారీలో ఉంది.

Also Read: కామాంధుడి కోసం రాష్ట్రమంతా జల్లెడ.. ఆచూకీ చెబితే రూ.10లక్షల రివార్డు, రంగంలోకి సజ్జనార్