కామాంధుడికి బుద్ధి చెప్పిన బాలిక.. హైదరాబాద్‌లో ఘటన

కామంతో కళ్లు మూసుకుపోయిన ఓ కామాంధుడు.. బాలికలపై కన్నేసి అఘాయిత్యానికి పాల్పడబోయాడు. ఈ క్రమంలోనే ఓ బాలిక అతడిపై కర్రతో దాడి చేయడంతో.. ఇద్దరూ అతడి బారి నుంచి తప్పించుకున్నారు. పోలీసులు ఈ ఘటనపై కేసు నమోదు చేసి నిందితుడిని అదుపులోకి తీసుకున్నారు. హైదరాబాద్‌లో జరిగిన ఈ సంఘటన ఆలస్యంగా వెలుగులోకి వచ్చింది..

పోలీసుల వివరాల మేరకు.. ఫిలింనగర్‌లోని బద్ధం బాల్‌రెడ్డినగర్‌ బస్తీలో నివసించే కైసర్‌ అనే వ్యక్తి దినసరి కూలీగా పని చేస్తున్నాడు. శనివారం సాయంత్రం తన ఇంటి ఎదుట ఆడుకుంటున్న నలుగురు బాలికలకు చాక్లెట్లు ఇస్తానని ఇంట్లోకి పిలిచాడు. వీరిలో ఇద్దరు తమకు దాహం వేస్తోందని బయటికి వచ్చేశారు. అయితే మరో ఇద్దరు తొమ్మిదేళ్ల బాలికలు గదిలోనే ఉండిపోయారు. ఈ క్రమంలోనే వీరిలో ఓ బాలికపై కైసర్‌ అఘాయిత్యానికి యత్నిస్తుండగా మరో బాలిక సమయస్ఫూర్తితో స్పందించి వెంటనే అక్కడ ఉన్న కర్రతో అతనిపై ఒక్కసారిగా దాడి చేసింది. ఈ క్రమంలోనే అతడు అక్కడే పడిపోవడంతో ఇద్దరు బాలికలు అక్కడి నుంచి బయటకు పారిపోయారు.

అప్పటికే తమ కూతుళ్లు కనిపించడం లేదంటూ వెతుకుతున్న తల్లిదండ్రులకు ఇంట్లో నుంచి పిల్లలు బయటికి రావడం కనిపించింది. ఏం జరిగిందని ప్రశ్నించగా అసలు విషయాన్ని తల్లికి చెప్పారు. అసభ్యంగా ప్రవర్తించారని వివరించారు. శనివారం రాత్రి బాధిత బాలిక తల్లితో పాటు ఆమె ఆడబిడ్డ ఇద్దరూ వెళ్లి కైసర్‌ను ప్రశ్నించగా వారిని కిందకు తోసేసి బైక్‌పై ఉడాయించాడు. ఘటనపై బాలిక తల్లి బంజారాహిల్స్‌ పోలీసులకు ఫిర్యాదు చేసింది. పోలీసులు కైసర్‌పై పోక్సో చట్టం కింద కేసు నమోదు చేసి ఆదివారం నిందితుడిని అరెస్టు చేశారు.