కూతురు కులాంతర వివాహం.. తట్టుకోలేక తండ్రి దారుణం

ఈ ప్రపంచంలో ఓ ఆడ పిల్లకి తొలి హీరో తన తండ్రే. ఏ సమస్య వచ్చినా.. ఏ కష్టం వచ్చినా.. నాన్న వచ్చి రక్షిస్తాడనే ధైర్యం ఉంటుంది. తనకు ఏమున్నా లేకున్నా కూతురుని యువరాణిలా చూసుకునే తండ్రులు ఎందరో ఉన్నారు. అయితే ప్రాణంగా పెంచుకున్న కూతురు చేసిన పనికి ఓ తండ్రి ప్రాణం తీసుకున్నాడు. కూతురు కులాంతర వివాహం చేసుకుందన్న బాధతో మదనపడి.. చివరికి ఉరేసుకొని ఓ తండ్రి ఆత్మహత్య చేసుకున్నాడు. ఈ ఘటన హైదరాబాద్ పరిధిలో చోటు చేసుకుంది.

వివరాల్లోకి వెళ్తే.. ఎస్‌బీఐ రిటైర్డు బ్యాంకు మేనేజర్‌ అనంతచారి వెంకటచారి (73) శనివారం ఉరేసుకొని ప్రాణాలు తీసుకున్నాడు. మల్కాజిగిరి, గౌతంనగర్‌లోని వెంకటసాయి నిలయం ప్రాంతానికి చెందిన వెంకటచారి కుమార్తె కొంతకాలం కింద తను ఇష్టపడ్డ వ్యక్తిని కులాంతర వివాహం చేసుకుంది. ఆ బాధతో వెంకటచారి మద్యానికి బానిసయ్యాడు. కూతురు గురించి ఆలోచిస్తూ మదనపడేవాడు.

TRS కు కుక్క కూడా ఓటేయదు.. మరోసారి ఆ పార్టీ గెలిస్తే గొంతు కోసుకుంటా: బీజేపీ ఎంపీ ప్రకటన
శుక్రవారం రాత్రి తన బెడ్రూంకు వెళ్లి ఎప్పటిలాగే పడుకున్నాడు. మరుసటి రోజు ఉదయం ఎంతకూ తలుపు తీయకపోవడంతో భార్య పద్మావతికి అనుమానం వచ్చింది. ఈ క్రమంలోనే ఇరుగుపొరుగు వారిని పిలిచి వారి సహాయంతో తలుపులు బద్దలు కొట్టి చూడగా వెంకటచారి సీలింగ్‌ ఫ్యాన్‌కు చీరతో ఉరేసుకుని విగతజీవిలా వేలాడుతూ కనిపించాడు. దీనిపై పోలీసులకు సమాచారం ఇవ్వగా.. కేసు నమోదు చేసుకుని దర్యాప్తు చేపట్టారు. తన కూతురు కులాంతర వివాహం చేసుకుందన్న బాధతోనే తన భర్త ఆత్మహత్యకు పాల్పడ్డాడని పోలీసులకిచ్చిన ఫిర్యాదులో పద్మావతి తెలిపింది.