నా కూతురిని ఒక్కసారి చూపించండి.. కాళ్లావేళ్లా పడిన తల్లి.. కానీ!!

కన్నబిడ్డను చూసుకోలేక ఆ తల్లి తల్లడిల్లిపోయింది. ఒక్కసారి చూపించండంటూ ప్రాధేయపడింది. అయినా కట్టుకున్న భర్త మనసు కరగలేదు. చూపించేది లేదంటూ కరాఖండిగా చెప్పేశాడు. కడుపున పుట్టిన కూతురిని చూసుకునేందుకు కూడా కుదరకపోవడంతో మానసికంగా కుంగిపోయిన తల్లి అఘాయిత్యానికి ఒడిగట్టింది. భర్త వేధింపులు.. కూతురిని దూరం చేయడం భరించలేక ఆత్మహత్య చేసుకుంది. ఈ విషాద ఘటన హైదరాబాద్‌లో జరిగింది.

నాంపల్లికి చెందిన స్వర్ణలత(32)కి తొమ్మిదేళ్ల కిందట బాలానగర్ గూడెన్‌మెట్ ఏరియాకి చెందిన నరేశ్‌తో వివాహమైంది. వారికి నిత్య అనే కూతురు పుట్టింది. కూలీ పనులు చేసుకునే నరేశ్ మద్యానికి బానిసయ్యాడు. నిత్యం మద్యం తాగొచ్చి తరచూ భార్యను వేధింపులకు గురిచేసేవాడు. నివాస ప్రదేశం మారితే భర్తలో మార్పు వస్తుందేమోనన్నతో ఆశతో ఆమె కుటుంబంతో సహా మెహిదీపట్నంకి మకాం మార్చింది. అయినా భర్తలో ఎలాంటి మార్పు రాలేదు.

నిత్యం వేధింపులు భరించలేకపోయిన స్వర్ణలత.. కొద్దిరోజుల కిందట భర్తతో గొడవపడి గూడెన్‌మెట్‌లో ఒక గది అద్దెకు తీసుకుని వేరుగా ఉంటోంది. ఆగ్రహం చెందిన భర్త తన కూతురిని సోదరుడి ఇంట్లో ఉంచాడు. రెండు రోజుల కిందట భర్త వద్దకు వెళ్లిన స్వర్ణలత తన కూతురిని తనతో పంపించమని అడిగింది. అందుకు భర్త ససేమిరా అనడంతో కనీసం ఒక్కసారి చూసి వెళ్లిపోతానని ప్రాధేయపడింది.

అయినా కరుడుగట్టిన మనిషి మనసు కరగలేదు. కన్నకూతురిని కనీసం చూపించేందుకు కూడా ఒప్పుకోలేదు. కూతురిని కనీసం కళ్లారా చూసుకోలేకపోయిన ఆ తల్లి తల్లడిల్లిపోయింది. దిగాలుగా అక్కడి నుంచి తాను ఉంటున్న గదికి తిరిగి వచ్చేసింది. తీవ్ర మనస్థాపానికి గురైన ఆమె ఇంట్లోనే ఉరేసుకుని ఆత్మహత్య చేసుకుంది. స్థానికులు గమనించి సమాచారం అందించడంతో పోలీసులు సంఘటన స్థలానికి చేరుకుని మృతదేహాన్ని పరిశీలించారు. కేసు నమోదు చేసుకుని దర్యాప్తు చేపట్టారు.

Also Read: