ఉద్యోగం కోసం వచ్చి మాయలోడికి చిక్కి... ముంబయి మహిళపై అఘాయిత్యం

ఉద్యోగం కోసం నగరానికి వచ్చిన యువతిని మాయమాటలతో నమ్మించాడు. ప్రేమిస్తున్నానని, పెళ్లి చేసుకుంటానని నమ్మించి శారీరక అవసరాలు తీర్చుకున్నాడు. తీరా బాధితురాలు పెళ్లి చేసుకోమని కోరగానే మొహం చాటేశాడు. మోసపోయానని గ్రహించిన బాధితురాలు పోలీసులను ఆశ్రయించడంతో ఈ ఘటన వెలుగులోకి వచ్చింది. ఈ ఘటన హైదరాబాద్‌లో వెలుగుచూసింది.

Also Read: సంక్రాంతికి ఇంటికి వెళ్తుండగా అదుపుతప్పిన బైక్.. పెదనాన్న, కుమార్తె మృతి

ముంబయికి చెందిన మహిళ(32) ఉద్యోగ ప్రయత్నాల కోసం 2011లో హైదరాబాద్‌ నగరానికి వచ్చింది. అమీర్‌పేట బిగ్‌బజార్‌ సమీపంలోని ఓ హాస్టల్‌లో ఉంటూ బీపీవోలో ఎగ్జిక్యూటివ్‌గా పనిచేస్తోంది. ఈ క్రమంలోనే ఓ షాపింగ్‌ మాల్‌కు వెళ్లిన సమయంలో వెంకటేశ్‌రాజు అనే వ్యక్తితో ఆమెకు పరిచయం ఏర్పడింది. తనకు సినీ పరిశ్రమలో చాలామందితో పరిచయాలు ఉన్నాయని, అవకాశాలు ఇప్పిస్తానని అతడు నమ్మించాడు.

కొద్దిరోజులు ఆమెను తన వెంట తిప్పుకున్న వెంకటేశ్ ప్రేమిస్తున్నానంటూ మాయమాటలు చెప్పి నమ్మించాడు. ఈ క్రమంలోనే ఆమెను లాడ్జికి తీసుకెళ్లి శారీరక వాంఛలు తీర్చుకున్నాడు. కొద్దిరోజుల తర్వాత పెళ్లి చేసుకోవాలని మహిళ కోరడంతో తప్పించుకుని తిరుగుతున్నాడు. దీంతో బాధితురాలు బంజారాహిల్స్ పోలీసులకు ఫిర్యాదు చేసింది. జీరో ఎఫ్ఐఆర్ నమోదు చేసిన అక్కడి పోలీసులు కేసును ఎస్సార్‌ నగర్‌ పోలీస్‌స్టేషన్‌కు బదిలీ చేశారు.