ప్రేమ.. పెళ్లి.. ఆ తర్వాత.? భార్య అనుమానాస్పద మరణం

తెలిసీ తెలియని వయసులో ప్రేమ.. పెద్దలు వారించినా లెక్కచేయకుండా ఎదిరించి పెళ్లి .. ఆ మూణ్నాళ్ల ముచ్చట తీరిపోగానే అసలు జీవితం మొదలవుతోంది. సంసార జీవితంలో చిన్నచిన్న ఇబ్బందులను కూడా భరించలేకపోతున్న నేటి యువత.. ఒకరినొకరు నిందించుకుంటూ.. క్షణికావేశంలో జీవితాలను బుగ్గిపాలు చేసుకుంటున్నారు. అలాంటి ఘటనలు రోజురోజుకీ పెరిగిపోతున్నాయి.తాజాగా హైదరాబాద్ ఎర్రగడ్డ పరిధిలో అలాంటి ఘటన ఒకటి వెలుగుచూసింది.

ప్రేమించి పెళ్లి చేసుకున్న యువతి అనుమానాస్పద స్థితిలో అనూహ్యంగా శవమై కనిపించింది. భర్త ఆత్మహత్య చేసుకుందని చెబుతుండగా.. ఆమె కుటుంబ సభ్యులు భర్తే హత్య చేసి ఆత్మహత్యగా చిత్రీకరించేందుకు యత్నిస్తున్నాడని ఆరోపిస్తున్నారు. కర్నూలు జిల్లాకు చెందిన శేఖర్ అనే యువకుడు అదే ప్రాంతానికి చెందిన నర్సమ్మ అనే యువతిని ప్రేమించాడు. పెళ్లి చేసుకోవాలని నిర్ణయించుకున్నారు.

ఇద్దరి పెళ్లికి పెద్దలు నిరాకరించడంతో వారిని ఎదిరించి వివాహ బంధంతో ఒక్కటయ్యారు. హైదరాబాద్ వచ్చిన కొత్త జంట ఎర్రగడ్డ ఏరియాలో ఇల్లు అద్దెకు తీసుకుని నివాసముంటున్నారు. కొద్దికాలం సాఫీగానే సాగిన వారి కాపురంలో కలహాలు రేగాయి. ఇద్దరి మధ్య గొడవలు జరుగుతున్నాయి. ఈ క్రమంలో అనూహ్యంగా నర్సమ్మ అనుమానాస్పద స్థితిలో చనిపోయింది.

తన భార్య ఆత్మహత్య చేసుకుందని భర్త శేఖర్ ఆమె కుటుంబ సభ్యులకు ఫోన్ చేసి చెప్పాడు. అయితే తమ కూతురి మరణంపై నర్సమ్మ కుటుంబ సభ్యులు అనుమానం వ్యక్తం చేస్తున్నారు. ఆమె భర్తే హత్య చేసి ఆత్మహత్యగా చిత్రీకరించే ప్రయత్నం చేస్తున్నారని పోలీసులకు ఫిర్యాదు చేశారు. మృతురాలి కుటుంబసభ్యుల ఫిర్యాదు మేరకు సనత్ నగర్ పోలీసులు అనుమానాస్పద మరణంగా కేసు నమోదు చేసి దర్యాప్తు చేపట్టారు.

Also Read: