డాక్టర్ సుధీర్ సజీవ దహనంపై సందేహాలు.. ప్రమాదమా? కుట్ర కోణమా?

హైదరాబాద్ ఔటర్‌ రింగు రోడ్డుపై శనివారం రాత్రి కారు దగ్ధమైన ఘటనలో డాక్టర్ నేలపాటి సుధీర్‌(39) మృతిపై అనేక అనుమానాలు వ్యక్తమవుతున్నాయి. ఆయన స్వస్థలం ఆంధ్రప్రదేశ్‌లోని ప్రకాశం జిల్లా పొన్నలూరు మండల కేంద్రంలోని శివాజీనగర్‌. గతంలో మలక్‌పేటలోని యశోదా ఆస్పత్రిలో ఆర్థోపెడిక్ డాక్టర్‌గా పనిచేసిన ఆయన ప్రస్తుతం మైనింగ్ వ్యాపారం చేస్తున్నారు. భార్య సుప్రజ, కుమారుడి(9)తో కలిసి కేపీహెచ్‌బీ పరిధిలోని సర్దార్‌ పటేల్‌ నగర్‌లో కుటుంబంతో కలిసి ఉంటున్నారు.

శనివారం బయటకు వెళ్తున్నానని కుటుంబ సభ్యులకు చెప్పిన సుధీర్ కారులో ఒంటరిగా బయలుదేరారు. నానక్‌రామ్‌గూడ వద్ద ఔటర్ రింగ్‌రోడ్డుపైకి ఎక్కారు. శంషాబాద్‌, హమీదుల్లానగర్‌ 135 కి.మీ వద్దకు రాగానే కారులో మంటలు చెలరేగాయి. ఈ ఘటనలో ఆయన సజీవ దహనమయ్యారు. షార్ట్‌సర్యూట్‌ కారణంగానే కారులో మంటలు చెలరేగి ఉంటాయని పోలీసులు భావిస్తున్నారు. అయితే ఈ ఘటనలో పోలీసులకు అనేక అనుమానాలు వ్యక్తమవుతున్నాయి.

ఔటర్ రింగ్ రోడ్డుపై గంటకు 100 కి.మీ వేగంతో ప్రయాణించడానికి అనుమతి ఉంది. సుధీర్‌ నానక్‌రామ్‌గూడ కూడలి వద్ద సాయంత్రం 7.09 గంటలకు ఔటర్‌పైకి ప్రవేశించినట్లు సీసీ కెమెరాల్లో నమోదైంది. నానక్‌రామ్‌గూడ నుంచి 20 కి.మీ దూరంలో ఉన్న హమీదుల్లానగర్‌కు 20 నిమిషాల్లోపే చేరుకోవచ్చు. కానీ సుధీర్‌ గంట ప్రయాణం చేసిన తర్వాత రాత్రి 8.10 గంటలకు హమీదుల్లానగర్‌ వద్ద కారు మంటల్లో చిక్కుకుంది. సుధీర్ ఔటర్‌పై ఎక్కడైనా ఆగారా? ..లేక కారు ఇంజిన్‌ మొరాయించిందా?.. ఏదైనా కుట్ర, ఆత్మహత్య కోణం ఉందా అన్ని విషయాలపై దర్యాప్తు చేస్తున్నట్లు పోలీసులు తెలిపారు. డాక్టర్ సుధీర్ మరణంతో పొన్నలూరు మండల కేంద్రంలో విషాద ఛాయలు అలముకున్నాయి.