కేసీఆర్‌తో రాఘవేంద్రరావు సినిమా తీయాలి, ఎందుకంటే..: బండి సంజయ్

తెలంగాణ సీఎం కేసీఆర్‌తో సినిమా తీయాలని టాలీవుడ్ ప్రఖ్యాత దర్శకుడు రాఘవేంద్రరావును తాను కోరతానని రాష్ట్ర బీజేపీ అధ్యక్షుడు బండి సంజయ్ కుమార్ ఎద్దేవా చేశారు. కేసీఆర్ నటన విషయంలో జీవిస్తారని వ్యాఖ్యానించారు. అందుకే దర్శకేంద్రుడు రాఘవేంద్రరావు కేసీఆర్‌తో సినిమా తీయాలని కోరారు. కేసీఆర్‌ను జోకర్‌గా పెట్టి సినిమా తీస్తే సూపర్ హిట్ అవుతుందని వ్యంగ్యాస్త్రాలు సంధించారు. ఆర్థికంగా వెనుకబడిన వర్గాల (ఈడబ్లూఎస్) రిజర్వేషన్ల అమలు విషయంపై శుక్రవారం బీజేపీ కార్యాలయంలో అగ్రవర్ణ సంఘాల ప్రతినిధులతో బండి సంజయ్ భేటీ అయ్యారు. అనంతరం సాయంత్రం బీజేపీ కార్యాలయంలో మీడియాతో మాట్లాడుతూ ఆయన ఈ వ్యాఖ్యలు చేశారు.

ముఖ్యమంత్రి కేసీఆర్, మంత్రి కేటీఆర్‌లపై తీవ్ర విమర్శలు గుప్పించారు. ఒకవేళ కేటీఆర్ ముఖ్యమంత్రి అయితే ఎదురయ్యే సమస్యలేంటో బండి సంజయ్ చెప్పారు. నిజంగా ఆయన ముఖ్యమంత్రి అయి కేటీఆర్ క్యాబినెట్ ఏర్పాటైతే రాష్ట్రంలో అణు బాంబు పేలడం ఖాయమని వ్యాఖ్యానించారు. ఇంకా ఆయన మాట్లాడుతూ.. ‘‘కేటీఆర్‌ను ముఖ్యమంత్రి చేయడానికి టీఆర్ఎస్ ఎమ్మెల్యేలు సహరించరు. కేటీఆర్ క్యాబినెట్ ఏర్పాటైతే అణుబాంబు పేలటం ఖాయం. ఈ దగుల్బాజీ పాలన ఉన్న రాష్ట్రాల్లో తప్ప అన్ని రాష్ట్రాల్లో ఈడబ్లూఎస్ రిజర్వేషన్లు అమలవుతున్నాయి. రెండేళ్లలో పేద విద్యార్థులకు జరిగిన అన్యాయానికి సీఎం బాధ్యత వహించి, ముక్కు నేలకు రాసి క్షమాపణ చెప్పాలి.

కండ కావరంతో రెండేళ్ళు నాన్చి ప్రజల్లో వ్యతిరేకత రావటంతో ఈడబ్లూఎస్ రిజర్వేషన్లు అమలు చేస్తానని ప్రకటించారు. ప్రకటనలకే పరిమితం కాకుండా రిజర్వేషన్లు కూడా అమలు చేయాలి. ఈడబ్ల్యూఎస్‌తో ఎవరి రిజర్వేషన్లూ తగ్గవు. అన్ని కుల సంఘాలు సహకరించాలి. కులాల మధ్య సీఎం కేసీఆర్ చిచ్చు పెట్టే ప్రయత్నం చేస్తారు. కేసీఆర్‌ను ముఖ్యమంత్రిని చేసినందుకు తెలంగాణ ప్రజలు దోష నివారణ పూజలు చేయాలి. పీఆర్సీ, ఈడబ్లూఎస్ రిజర్వేషన్లు అమలు చేయకపోవటంతో మెడలు వంచి అమలు చేయిస్తాం.’’ అని బండి సంజయ్ వ్యాఖ్యానించారు.