Rajiv Swagruha: రాజీవ్ స్వగృహ ఫ్లాట్లకు లాటరీ.. ఫేస్‌బుక్‌, యూట్యూబ్‌లో లైవ్‌ స్ట్రీమింగ్‌

హైదరాబాద్‌లోని బండ్లగూడ, పోచారంలోని రాజీవ్‌ స్వగృహ ఫ్లాట్ల కోసం దరఖాస్తు చేసుకున్న వారికి ఇవ్వాళ ఉదయం 9 గంటల నుంచి లాటరీ పద్ధతిలో అధికారులు ఫ్లాట్లు కేటాయించనున్నారు. అయితే లాటరీ షెడ్యూల్, ఇతర పూర్తి వివరాలను రాజీవ్ స్వగృహ, హెచ్ఎండీఏ వెబ్‌సైట్‌లో అందుబాటులో ఉంచామని అధికారులు తెలిపారు. బండ్లగూడ, పోచారంలోని రాజీవ్‌ స్వగృహ ఫ్లాట్ల అమ్మకానికి భారీ స్పందన లభించిన విష‌యం తెలిసిందే. అయితే ఈ ఫ్లాట్ల విక్రయానికి హెచ్‌ఎండీఏ నోటిఫికేషన్ ఇవ్వడంతో.. నేటి నుంచి లాటరీ పద్ధతిలో ఫ్లాట్లు కేటాయింపు జ‌ర‌గ‌నుంది.

బండ్లగూడలోని 2,246 ఫ్లాట్ల కోసం 33,161 దరఖాస్తులు వ‌చ్చాయి. అలాగే పోచారంలోని 1,470 ఫ్లాట్ల కోసం 5,921 దరఖాస్తులు రాగా.. అత్యధికంగా బండ్లగూడలోని 345 ట్రిపుల్ బెడ్రూం డీలక్స్ ఫ్లాట్ల కోసం అత్యధికంగా 16,679 మంది దరఖాస్తు చేసుకున్నారు. అయితే ఇవ్వాళ ఉదయం లాటరీ ప్రక్రియ ప్రారంభమవుతున్న నేపథ్యంలో ఫేస్‌బుక్‌, యూట్యూబ్‌లలో లైవ్‌ స్ట్రీమింగ్‌కు అధికారులు ఏర్పాట్లు చేశారు.

ఇవ్వాళ పోచారం, మంగళవారం (28న) బండ్లగూడ, బుధవారం (29న) బండ్లగూడ ట్రిపుల్ బెడ్రూం డీలక్స్ ఫ్లాట్ల కోసం డ్రా ప‌ద్ధతిలో లబ్ధిదారులను ఎంపిక చేయనున్నారు. అయితే ఈ పూర్తి ప్రక్రియను హెచ్‌ఎండీఏ అధికారులు రికార్డు చేయడ‌మే కాకుండా.. ఒక వ్యక్తికి ఒక ఫ్లాట్‌ మాత్రమే కేటాయిస్తామని అధికారులు వెల్లడించారు. ఇందుకు ప్రాతిపదికగా ఆధార్‌ సంఖ్యను తీసుకోనున్నారు.