శంషాబాద్‌ ఎయిర్‌పోర్టులో రోబో సేవలు.. ప్రయాణికులకు మెరుగైన సేవలు

GMR Innovex Robotics: శంషాబాద్ విమానాశ్రయంలో ప్రయాణికులకు మరింత మెరుగైన సేవలు అందించేందుకు అధికారులు రోబోటిక్‌ టెక్నాలజీని వినియోగించనున్నారు. ఎయిర్‌పోర్టులో అడుగుపెట్టిన క్షణం నుంచి విమానంలో కూర్చునేంత వరకూ ప్రయాణికులకు అవసరమైన సేవలను రోబోలు అందించనున్నాయి. అలాగే ఎయిర్‌పోర్టును పరిశుభ్రంగా ఉంచేందుకు రోబోటిక్‌ పరిజ్ఞానంతో పనిచేసే పరికరాలు, యంత్రాలను అందుబాటులోకి తీసుకురానున్నారు. ఇందుకోసం జీఎంఆర్‌ ఇన్నోవెక్స్‌ పేరుతో ప్రత్యేక కేంద్రాన్ని ప్రారంభించారు. ఇందులో రోబోలు, యంత్రాలు, పరికరాలు తయారు చేసేందుకు, అవసరమైన సాంకేతిక పరిజ్ఞానాన్ని అభివృద్ధి చేసేందుకు గాను స్టార్టప్‌లను ఆహ్వానిస్తున్నారు. రోబోటిక్‌ సాంకేతిక పరిజ్ఞానంపై కొత్త ఆవిష్కరణలను పంచుకునేందుకు ఐఐటీ-బాంబే, పెప్పరమెంట్‌, సైన్‌ సంస్థలతో ఎయిర్‌పోర్టు అధికారులు ఎంవోయూ కుదుర్చుకున్నారు.

రోబోటిక్స్‌ పరిజ్ఞానంపై పరిశోధనలు చేస్తున్న స్టార్టప్‌లను గుర్తించి ఎయిర్‌పోర్టు, విమానయాన రంగం కోసం కొత్త రోబోటిక్‌ ఉత్పత్తుల అభివృద్ధికి ప్రత్యేక కేంద్రం సహకరిస్తుంది. రోబోల తయారీకి స్టార్టప్‌లకు రోబోటిక్‌ ల్యాబ్‌ను సమకూర్చారు. ఎయిర్‌పోర్టులో ఫ్లోర్ క్లీనింగ్, మెట్లను, వాష్ రూమ్స్ శుభ్రం చేసేందుకు ఇప్పటికే ప్రయోగాత్మకంగా రోబోలను వినియోగిస్తున్నారు. అత్యాధునిక పరిష్కారాలను అభివృద్ధి చేసేందుకు ఈ కేంద్రాన్ని ప్రారంభించామని శంషాబాద్‌ విమానాశ్రయ సీఈవో ప్రదీప్‌ ఫణికర్‌ వెల్లడించారు.

• Read More Telangana News And Telugu News