సికింద్రాబాద్ అల్లర్లు: పెద్ద ప్రమాదమే తప్పింది.. పవర్ కార్‌కు నిప్పు అంటుకొనుంటే!

అగ్నిపథ్ స్కీమ్‌కు వ్యతిరేకంగా సికింద్రాబాద్ రైల్వే స్టేషన్ వద్ద చేపట్టిన ఆందోళనలో జరిగిన విధ్వంసంలో 5 రైలు ఇంజిన్లు (లోకో మోటార్స్), 30 రైలు బోగీలు, పార్శిల్ కార్యాలయం పూర్తిగా ధ్వంసం అయినట్లు సికింద్రాబాద్‌ రైల్వే రీజినల్ మేనేజర్‌ గుప్తా తెలిపారు. నిప్పు పెట్టిన బోగీల్లో ప్రయాణికుల సామగ్రి పూర్తిగా ధ్వంసమైందని ఆయన తెలిపారు. పవర్ కార్ (డీజిల్ ట్యాంకర్)కు భారీ ప్రమాదం తప్పిందని గుప్తా చెప్పారు. ఒకవేళ పవర్ కార్‌కు మంటలు అంటుకుంటే భారీ ఆస్తి, ప్రాణ నష్టం జరిగేదన్నారు. ఆందోళనకారులను సకాలంలో అదుపు చేయడంతో పెద్ద ప్రమాదమే తప్పిందని అన్నారు.

సికింద్రాబాద్‌ రైల్వే స్టేషన్‌లో చెలరేగిన అల్లర్లలో ప్రత్యక్ష్యంగా 12 కోట్ల రూపాయల ఆస్తి నష్టం వాటిల్లిందని డీఎం గుప్తా తెలిపారు. అల్లర్ల అనంతరం సికింద్రాబాద్ డివిజన్ పరిధిలో పలు రైళ్లను రద్దు చేసిన కారణంగా జరిగిన నష్టాన్ని అంచనా వేస్తున్నామని ఆయన తెలిపారు.

ప్రస్తుతం సికింద్రాబాద్ రైల్వే స్టేషన్‌లో సాధారణ పరిస్థితులు నెలకొన్నాయని.. అన్ని ప్యాసింజర్, గూడ్స్ రైళ్లను పునరుద్ధరించామని డీఎం గుప్తా చెప్పారు. అల్లర్ల ఘటనపై దర్యాప్తు సంస్థలు విచారణ జరుపుతున్నాయని ఆయన తెలిపారు. శనివారం (జూన్ 18) ఉదయం మీడియా ప్రతినిధులతో ఆయన మాట్లాడారు.

మరోవైపు.. అగ్నిపథ్ నిరసన ముసుగులో కొంత మంది చోరీలకు పాల్పడ్డారు. బిహార్‌లోని ఓ రైల్వే స్టేషన్‌లో రూ.3 లక్షల నగదును ఆందోళనకారులు ఎత్తుకెళ్లినట్లు పోలీసు వర్గాలు తెలిపాయి.