కరెంట్ తీగలపై తాచుపాము.. మీదపడితే.! దెబ్బకి సిటీలో ట్రాఫిక్ జామ్

పాముని చూస్తేనే జడుసుకుని పారిపోతాం.. అలాంటిది మన నడినెత్తి మీద నుంచి పోతున్న కరెంటు తీగలపై పాము జరజరా పాకుతూ కనిపిస్తే.! గుండె గుభేల్‌మనడం ఖాయం. అదెక్కడ మనమీద పడుతుందోనని భయం కలగకమానదు. అదే సంఘటన ఎప్పుడూ జనంతో కిక్కిరిసిపోయే హైదరాబాద్ నగర రోడ్లపై జరిగితే ఇంకేమైనా ఉందా.! కానీ అదే జరిగింది. కొత్తపేట నుంచి సరూర్ నగర్ వెళ్లే ప్రధాన రహదారి వెంట ఉన్న చెట్టుకొమ్మల పైనుంచి కరెంటు తీగలపైకి పాకుతున్న తాచుపామును చూసి కంగుతిన్నారు జనం.

విద్యుత్ వైర్లపై వెళ్తున్న తాచుపామును స్థానికులు, వాహనదారులు గమనించారు. అదెక్కడ మీదపడుతుందోనన్న భయంతో జనం పరుగులు తీయడంతో కలకలం రేగింది. వెంటనే స్థానికులు అప్రమత్తమై ఫ్రెండ్స్‌ స్నేక్ సొసైటీకి సమాచారం అందించారు. సొసైటీ సభ్యులు అక్కడికి చేరుకుని పామును పట్టుకుని సురక్షితంగా అక్కడి నుంచి తరలించడంతో జనం ఊపిరిపీల్చుకున్నారు. అయితే ఈ సంఘటన స్థానికంగా అలజడి రేపడంతో పెద్దఎత్తున వాహనదారులు, స్థానికులు చూస్తూ రోడ్డుపై నిల్చుండిపోయారు. దీంతో ట్రాఫిక్ జామ్ అయింది. పామును పట్టుకుని తీసుకెళ్లిన అనంతరం పోలీసులు ట్రాఫిక్‌ను క్లియర్ చేశారు.

Also Read: