Swiggy: డెలివరీ బాయ్‌పై దాడి చేసిన యువకులు.. కిక్ బాక్సింగ్ తరహాలో!

డెలివరీ బాయ్‌పై ముగ్గురు యువకులు దాడి చేసిన ఘటన హైదరాబాద్‌లోని చైతన్యపురిలో చోటు చేసుకుంది. దాడి చేసిన ముగ్గురు యువకులు తాగిన మైకంలో ఉన్నారు. వారితో పాటు ఒక యువతి కూడా ఉంది. ఆ అమ్మాయి కూడా మద్యం మత్తులో ఉందని స్థానికులు చెబుతున్నారు. స్విగ్గీ డెలివరీ బాయ్‌పై కిక్ బాక్సింగ్ తరహాలో దాడి చేశారు. ముగ్గురు యువకుల్లో ఇద్దరు ఇటీవలే ఆస్ట్రేలియా నుంచి వచ్చినట్లు తెలుస్తోంది. దాడి జరుగుతుండగా.. ఆ దృశ్యాలను కారులో ఉన్న యువతి చిత్రీకరించింది. సీసీ కెమెరాల్లోనూ దాడి దృశ్యాలు నిక్షిప్తమయ్యాయి. హైదరాబాద్‌లో డెలివరీ బాయ్ కత్తితో పొడవడంతో చెఫ్ మృతి చెందిన ఘటన గురించి చర్చ జరుగుతుండగానే.. మరో ఘటన వెలుగులోకి రావడం గమనార్హం.

రాచకొండ కమిషనరేట్ పరిధిలోని చైతన్యపురి పోలీస్ స్టేషన్ పరిధిలో భవానీ నగర్ చౌరస్తాలో శనివారం ఉదయం 7.30 గంటల సమయంలో ఈ ఘటన జరిగింది. యువకుల దాడిలో గాయపడిన స్విగ్గీ డెలివరీ బాయ్ ప్రవీణ్ కుమార్‌ను ఉస్మానియా ఆస్పత్రికి తరలించి చికిత్స అందించారు. ప్రవీణ్ కుమార్‌పై దాడి జరుగుతున్న విషయం గమనించి మరో ఇద్దరు డెలివరీ బాయ్స్.. అక్కడికి వచ్చి అడ్డుకునే ప్రయత్నం చేశారు. నిందితులు వారిపైనా దాడి చేశారు.

దాడి చేసిన ముగ్గురు యువలతో పాటు వారితో ఉన్న అమ్మాయి.. అందరూ మద్యం మత్తులో ఉన్నారని స్థానికులు కూడా తెలిపారు. దాడి చేసి పారిపోతున్న యువకులను స్విగ్గీ బాయ్స్‌ వెంటపడి, సరూర్ నగర్ వద్ద పట్టుకొని పోలీస్ స్టేషన్‌లో అప్పగించారు. ఘటనపై ఫిర్యాదు చేశారు. యువకులతో పాటు ఉన్న అమ్మాయి తనతో డెలివరీ బాయ్ అనుచితంగా ప్రవర్తించాడంటూ పోలీసులకు ఫిర్యాదు చేయడం గమనార్హం. కేసు నమోదు చేసి దర్యాప్తు చేస్తున్నట్లు చైతన్యపురి పోలీసులు తెలిపారు. డెలివరీ బాయ్‌కు, యువకులకు మధ్య ఏ విషయంలో వాగ్వాదం తలెత్తిందనే విషయం తెలియాల్సి ఉంది.

నిజాం తప్పు చేసుంటే ఉరి తీసేవారుగా.. మరి రాజ్‌ప్రముఖ్ ఇచ్చారు: హోంమంత్రి
చైనాలో భారీ అగ్నిప్రమాదం.. మంటల్లో డజన్లకొద్దీ అంతస్తులు
Read Latest Telangana News and Telugu News