హైదరాబాద్‌లో ఓ SI పాడు పని.. వెంటనే సస్పెండ్ చేసేసిన సీపీ

హైదరాబాద్‌లోని టపాచబుత్ర పోలీస్ స్టేషన్‌లో విధులు నిర్వహిస్తున్న ఎస్సైను కమిషనర్ అంజనీ కుమార్ సస్పెండ్ చేశారు. వివాహేతర సంబంధం ఉన్నట్లుగా బేగంపేట్ పీఎస్‌లో ఎస్సైపై కేసు నమోదు అయ్యింది. ఈ మేరకు సీపీ ఎస్ఐను సస్పెండ్ చేశారు. ఈ సంఘటన ఆలస్యంగా వెలుగులోకి వచ్చింది. మధు అనే వ్యక్తి టపాచబుత్ర పోలీస్ స్టేషన్‌లో ఎస్సైగా పని చేస్తున్నారు. ఆయన తనను మోసం చేశాడని ఓ యువతి ఆత్మహత్యాయత్నం చేసింది. విషయం తెలుసుకున్న వెంటనే కుటుంబ సభ్యులు ఆమెను హాస్పిటల్‌కు తరలించారు. ప్రస్తుతానికి ఆమె యశోద ఆస్పత్రిలో చికిత్స పొందుతోంది.

తనని పెళ్ళి చేసుకుంటానని చెప్పి తనతో వివాహేతర సంబంధం పెట్టుకొని అనంతరం ఇప్పుడు పెళ్లి చేసుకోనంటూ మోసం చేశాడని ఆ యువతి తన ఫిర్యాదులో పేర్కొంది. బేగంపేట పోలీసుతో పాటు టపాచబుత్ర, పశ్చిమ మండల డీసీపీకి బాధితురాలు ఫిర్యాదు చేసింది. గతంలో వివాహం అయిన ఎస్సై మధు బాదితురాలితో వివాహేతర సంబంధం పెట్టుకున్నాడని, తనను మోసం చేశాడంటూ ఆ యువతి ఆత్మహత్యయత్నానికి పాల్పడింది. దీంతో సీపీ వెంటనే పూర్తి స్థాయిలో దర్యాప్తు చేయాలంటూ అధికారులను ఆదేశించారు. పూర్తి స్థాయిలో విచారణ చేపట్టిన అనంతరం విషయం తెలుసుకున్న వెంటనే సీపీ అంజనీ కుమార్ ఈ నెల 15న ఎస్సైని సస్పెండ్ చేశారు.