Tandur Venkat Reddy: చౌటుప్పల్ ఎంపీపీ ఇంటికి టాస్క్‌ఫోర్స్ పోలీసులు.. అర్ధరాత్రి హైడ్రామా

హైదరాబాద్‌ నగర శివారు వనస్థలిపురంలో సోమవారం అర్ధరాత్రి హైడ్రామా నడిచింది. యాదాద్రి భువనగిరి జిల్లా చౌటుప్పల్ మండల ఎంపీపీ తాండూరు వెంకట్ రెడ్డి ఇంటిని టాస్క్‌ఫోర్స్ అధికారులు చుట్టుముట్టారు. చౌటుప్పల్ పోలీస్‌స్టేషన్‌లో పెండింగ్‌లో ఉన్న కేసుల్లో భాగంగా విచారణకు రావాలని పోలీసులు ఎంపీపీ వెంకట్‌‌‌రెడ్డిని ఒత్తిడి చేస్తున్నారు. ఈ క్రమంలోనే సోమవారం రాత్రి వెంకట్‌రెడ్డిని తమతో తీసుకెళ్లేందుకు పోలీసులు ఆయన ఇంటికి వెళ్లారు. ఈ విషయాన్ని ముందుగానే పసిగట్టిన బీజేపీ నేతలు వెంకట్‌రెడ్డిని మరో ప్రాంతానికి తరలించారు.

అయితే తమ నివాసానికి వచ్చిన పోలీసులతో ఎంపీపీ వెంకట్‌రెడ్డి భార్య, బంధువులు వాగ్వాదానికి దిగారు. ఈ విషయం తెలుసుకున్న బీజేపీ రంగారెడ్డి జిల్లా అర్బన్ అధ్యక్షుడు సామ రంగారెడ్డి, బీజేపీ నేతలు అక్కడికి చేరుకుని పోలీసులతో వాగ్వాదానికి దిగారు. దీంతో పోలీసులు చేసేదేమీ లేక వెంకట్‌రెడ్డికి నోటీసులు ఇచ్చి వెనుదిరిగారు. ఎంపీపీ టీఆర్ఎస్‌ని వీడి బీజేపీలో చేరనున్నట్లు వార్తలు రావడంతోనే పోలీసులు వేధింపులకు గురిచేస్తున్నారని కుటుంబసభ్యులు ఆరోపిస్తున్నారు. టీఆర్ఎస్‌లో ఉన్నన్ని రోజులు కేసుల గురించి మాట్లాడని పోలీసులు ఇప్పుడు ఎందుకు విచారణకు పిలుస్తుండటం వెనుక రాజకీయ కుట్ర ఉందన్న ఆరోపణలు వెల్లువెత్తుతున్నాయి.