Hyd:మోసపోయిన టీనేజ్ యువతి ఆత్మహత్య.. ప్రియుడికి షాక్

ప్రేమ పేరుతో వంచించాడు. పెళ్లి పేరుతో ఆమెను శారీరకంగా లొంగదీసుకున్నాడు. తీరా మోజు తీరాక ముఖం చాటేశాడు పెళ్లి చేసుకోమని అడిగితే నిరాకరించడంతో పాటు తప్పించుకుని తిరగడం మొదలుపెట్టాడు. ప్రియుడి మోసాన్ని భరించలేన టీనేజ్ యువతి దారుణ నిర్ణయం తీసుకుంది. లోకం విడిచి వెళ్లిపోయింది. ఈ అత్యంత విషాద ఘటన హైదరాబాద్‌ శివారులో చోటుచేసుకుంది.

మేడ్చల్ జిల్లా ఘట్‌కేసర్ పోలీస్ స్టేషన్ పరిధిలోని పకీర్‌టెక గ్రామానికి చెందిన టీనేజ్ యువతి(మైనర్)ని అదే గ్రామానికి చెందిన వంశీ ప్రేమిస్తున్నానంటూ వెంటపడ్డాడు. నమ్మేసిన యువతి అతన్ని ప్రేమించింది. ఇద్దరి మధ్య సాన్నిహిత్యం పెరిగింది. పెళ్లి పేరుతో ఆమెకు దగ్గరైన వంశీ.. శారీరకంగా లోబరుచుకున్నాడు. కొద్దిరోజుల తర్వాత పెళ్లి చేసుకుందామని యువతి అడగడంతో ప్రియుడి అసలు స్వరూపం బయటపడింది.

పెళ్లి చేసుకునేది లేదని తేల్చి చెప్పేయడంతో తాను మోసపోయానని యువతి కుమిలిపోయింది. ప్రియుడి చేతిలో మోసపోయి అఘాయిత్యానికి ఒడిగట్టింది. తీవ్ర మనస్థాపంతో యాసిడ్ తాగేసి ఆత్మహత్య చేసుకుంది. సమాచారం అందుకున్నపోలీసులు వెంటనే సంఘటన స్థలానికి చేరుకుని ఘటనపై ఆరా తీశారు. మృతదేహాన్ని పరిశీలించి పోస్టుమార్టం కోసం ఉస్మానియా ఆస్పత్రికి తరలించారు. ఆమె మైనర్ కావడంతో ప్రియుడిపై పోక్సో చట్టం కింద కేసు నమోదు చేసి దర్యాప్తు చేస్తున్నారు.

Also Read: