Telangana Congress: ఇందిరాపార్కు వద్ద ఉద్రిక్తత.. సీతక్క అరెస్టు, స్టేషన్లకు తరలింపు

ఫోన్‌ ట్యాపింగ్‌ ద్వారా భారత్‌లోని చాలామంది ఫోన్లను పెగసస్‌ తన అధీనంలోకి తీసుకుంటోందని ఏఐసీసీ అధికార ప్రతినిధి దాసోజు శ్రవణ్‌ ఆరోపించారు. ఏఐసీసీ పిలుపుతో టీపీసీసీ కార్యనిర్వాహక అధ్యక్షుడు అంజన్‌కుమార్‌ యాదవ్‌ అధ్యక్షతన ధర్నా నిర్వహించారు. ప్రైవసీ యాక్ట్‌ ప్రకారం ఇది ముమ్మాటికీ రాజ్యాంగ ఉల్లంఘనే అవుతుందన్నారు. ఓటమి భయంలోనే ప్రతిపక్షాలు, న్యాయమూర్తులు, మీడియా ప్రతినిధుల ఫోన్లను ప్రధాని ట్యాప్‌ చేయిస్తున్నారని ఆరోపించారు. తెలంగాణలో సీఎం కేసీఆర్‌ కూడా ఫోన్‌ ట్యాపింగ్‌ చేయిస్తున్నారన్నారు. ఈ వ్యవహారంపై కేంద్ర మంత్రి కిషన్‌ రెడ్డికి ఫిర్యాదు చేసినా పట్టించుకోవడం లేదని మండిపడ్డారు. ఈ అంశంపై పార్లమెంటరీ కమిటీ ద్వారా విచారణ జరిపించాలని డిమాండ్ చేశారు.

తెలంగాణ కాంగ్రెస్ పార్టీ ఆధ్వర్యంలో గురువారం మధ్యాహ్నం ఛలో రాజ్ భవన్ ముట్టడికి పిలుపునిచ్చిన వేళ ఇందిరా పార్కు నుంచి కాంగ్రెస్ కార్యకర్తలు, నాయకులు బయల్దేరారు. సమాచారం అందుకున్న వెంటనే పోలీసులు సంఘటనా స్థలానికి చేరుకొని ముందస్తు జాగ్రత్తగా కార్యకర్తలను, నాయకులను అరెస్టు చేసి వివిధ పోలీస్ స్టేషన్లకు తరలించారు. ఈ సందర్భంగా కాంగ్రెస్ కార్యకర్తలకు పోలీసులకు మధ్య తీవ్ర వాగ్వివాదం చెలరేగింది. దీంతో ఇందిరా పార్క్ పరిసరప్రాంతాలు ఉద్రిక్తత వాతావరణం నెలకొంది.

ధర్నాలో పాల్గొన్న సీతక్క మాట్లాడుతూ.. ‘‘కేంద్ర, రాష్ట్ర ప్రభుత్వాలు వ్యక్తిగత స్వేచ్ఛను హరిస్తున్నాయి. ఫోన్ ట్యాపింగ్‌కు పాల్పడుతూ హక్కులకు భంగం కలిగిస్తున్నాయి. సమాచారాన్ని విదేశాల చేతుల్లో పెడుతున్నారు. దేశ భద్రతకు ప్రధాని మోదీ, కేంద్ర మంత్రి అమిత్ షా ముప్పు తెస్తున్నారు’’ అని అన్నారు. ఈ క్రమంలోనే పోలీసులు సీతక్కను అరెస్టు చేశారు.