అపోలో హాస్పిటల్‌లో చేరిన తెలంగాణ ప్రజారోగ్య శాఖ డైరెక్టర్..!

తెలంగాణ ప్రజారోగ్య శాఖ సంచాలకులు డాక్టర్ జి. శ్రీనివాసరావు హాస్పిటల్‌లో చేరారు. అపోలో హాస్పిటల్‌లో ఆయనకు కార్డియాక్ ఎవల్యూయేషన్ చేస్తున్నారు. సోమవారం ఉదయం హాస్పిటల్‌లో చేరిన ఆయన.. టెస్టులు చేయించుకుంటూ చికిత్స పొందుతున్నారు. ఆయన ఆరోగ్య పరిస్థితి నిలకడగానే ఉంది. ఒకటి రెండు రోజుల్లో ఆయన డిశ్చార్జ్ అయ్యే అవకాశం ఉంది. రాష్ట్రంలో తొలి కరోనా కేసు నమోదైన నాటి నుంచి ఆయన అవిశ్రాంతంగా పని చేస్తున్నారు. కరోనా కేసుల కట్టడి, వ్యాక్సినేషన్ కోసం విరామం లేకుండా పని చేస్తున్నారు. దీంతో ఆయన తీవ్ర ఒత్తిడికి గురయ్యారని తెలుస్తోంది.

కోవిడ్ గురించి ప్రజల్లో అవగాహన కల్పించడం, హాస్పిటళ్లలో అందుతున్న చికిత్స తదితర పనులతో చాలా రోజులు బిజీగా గడిపిన శ్రీనివాస రావు.. ఇటీవల టీకా పంపిణీ తీరును పర్యవేక్షిస్తున్నారు. రాష్ట్రంలో వ్యాక్సినేషన్ ప్రక్రియ ప్రారంభించాక.. తొలి రోజు ఎంత మంది టీకా వేసుకున్నారనే విషయాన్ని ఆయన వెల్లడించారు. గత ఏడాది కాలంలో ఆయన అనేకసార్లు మీడియా ముందుకొచ్చి ప్రజల్లో అవగాహన పెంపొందించే ప్రయత్నం చేశారు. రూమర్ల విషయంలోనూ ఆయన స్పందించారు. ఫిబ్రవరి 8న ఆయన కోవిడ్ తొలి టీకా వేయించుకున్నారు.