నాకు కారు డ్రైవింగ్ నేర్పింది ఆయనే.. అక్కడ డ్రైవింగ్ చేస్తే ఎక్కడైనా నడపొచ్చు: సబితా ఇంద్రారెడ్డి

కఠోర శ్రమ, ధృడ సంకల్పం, నేర్చుకోవాలనే తపన ఉంటే ఏదైనా సాధ్యమేనని తెలంగాణ విద్యాశాఖ మంత్రి సబితా ఇంద్రారెడ్డి (Sabitha Indrareddy) అన్నారు. తెలంగాణ ప్రభుత్వ సహకారంతో డ్రైవింగ్ శిక్షణ పూర్తి చేసుకున్న యువతులతో తాను డ్రైవింగ్ నేర్చుకున్న అనుభవాలను మంత్రి పంచుకున్నారు. రంగారెడ్డి జిల్లాలో 23 మంది యువతులకు ఎస్సీ కార్పొరేషన్‌ (SC Corporation) ద్వారా మంజూరైన షీ క్యాబ్స్‌ (She Cabs) వాహనాలను శుక్రవారం సరూర్‌నగర్‌ (Saroornagar) వీఎంహోంలో మంత్రి అందించారు.

ఆ సందర్భంగా వారితో ముచ్చటించిన మంత్రి సబితా.. తాను మూడు రోజుల్లోనే కారు డ్రైవింగ్ నేర్చుకున్నానని చెప్పారు. 'మా ఆయనే నాకు డ్రైవింగ్ నేర్పించారు' అని వెల్లడించారు. సికింద్రాబాద్‌ జింఖానా గ్రౌండ్‌లో (Gymkhana Grounds) మొదటి రోజు స్టీరింగ్, రెండో రోజు బ్రేక్, గేర్ల గురించి నేర్చుకున్నానని చెప్పారు. మూడో రోజు స్టీరింగ్‌ కంట్రోల్‌ చేస్తూ కారు (Car Driving) నడిపానన్నారు. ఇక నాలుగో రోజు రోడ్డుపై స్వయంగా కారు నడిపానని అన్నారు. హైదరాబాద్ ఓల్డ్ సిటీలో (Old city) డ్రైవింగ్ చేస్తే ఎక్కడైనా చెయ్యుచ్చు అని ఇంద్రారెడ్డి రెడ్డి గారు చార్మినార్‌లో (Charminar) తనను ఒంటరిగా వదిలిపెట్టారని గత అనుభవాలను మంత్రి గుర్తు చేసుకున్నారు. అలా డ్రైవింగ్‌ పర్‌ఫెక్ట్‌గా నేర్చుకున్నానని సబిత వారితో వెల్లడించారు.