Hyd మహిళలకు TSRTC గుడ్ న్యూస్.. డ్రైవర్లు తప్పకుండా పాటించాల్సిందే..

హైదరాబాదీ మహిళలకు తెలంగాణ ఆర్టీసీ శుభవార్త చెప్పింది. ఇకపై హైదరాబాద్‌లో రాత్రి వేళల్లో ఆర్టీసీ బస్సులను మహిళల కోసం రోడ్డుపై ఎక్కడ పడితే అక్కడ ఆపాలని నిర్ణయించింది. బస్‌ స్టాపునకు తమ పని ప్రదేశానికి మధ్య దూరం ఎక్కువగా ఉంటే రాత్రి వేళ వర్కింగ్ మహిళలకు ఇబ్బంది తలెత్తుతుంటుంది. దీంతో ఈ సమస్యకు చెక్‌ పెట్టడానికి టీఎస్‌ఆర్టీసీ కొత్త నిర్ణయం తీసుకుంది. ఇకపై రాత్రి 7.30 దాటిన తర్వాత మహిళలు చెయ్యి ఎత్తిన చోట బస్సు ఆగేలా, అలాగే వారు కోరుకున్న చోట దిగేలా చర్యలు తీసుకుంటున్నారు.

ఆపకపోతే ఫిర్యాదు
ఈ క్రమంలోనే మహిళా ప్రయాణికులు కేవలం బస్‌ స్టాపుల్లోనే కాకుండా తమకు ఇష్టమైన చోట దిగే వెసులుబాటును కల్పించారు. బస్సు డ్రైవర్లు ఈ నిబంధనను తప్పకుండా అమలు చేయాల్సిందేనని ఉన్నతాధికారులు ఆదేశించారు. ఈ కొత్త విధానాన్ని ఆర్టీసీ మంగళవారం నుంచి అమల్లోకి తీసుకొచ్చేసింది. ఒకవేళ మహిళా ప్రయాణికులు తాము కోరుకున్న చోట బస్సు ఆపకపోతే వెంటనే డిపో మేనేజర్లకు ఫిర్యాదు చేసే అవకాశాన్ని కల్పించారు.

ఈ విషయంపై ఆర్టీసీ గ్రేటర్‌ హైదరాబాద్‌ ఎగ్జిక్యూటివ్‌ డైరెక్టర్‌ వెంకటేశ్వర్లు నగరంలోని 29 డిపోలకు చెందిన మేనేజర్లను ఆదేశించారు. మహిళలు ఎక్కువ సమయం బస్టాపుల్లోనే వేచి ఉండకుండా.. బస్సు కోసం ప్రత్యేకంగా బస్టాపులకు వెళ్లాల్సిన అవసరం లేకుండా ఈ అవకావం కల్పించినట్లు వెంకటేశ్వర్లు తెలిపారు. ఈ విధానం అమల్లో ఏమైనా ఇబ్బందులు ఎదురైతే 99592 26160, 9959226154 నెంబర్లకు ఫిర్యాదు చేయవచ్చని ఆయన సూచించారు. దీంతోపాటు.. ముఖ్యమైన బస్టాపుల్లో రాత్రి 10 గంటల వరకు బస్సుల నియంత్రణ అధికారులుండేలా చర్యలు తీసుకోనున్నారు.