రహస్యంగా పెళ్లి చేసుకున్న ఇద్దరమ్మాయిలు.. పెద్దల ఎంట్రీ, చివరికిలా

వారిద్దరూ అమ్మాయిలు. రెండేళ్లు కలిసి చదువుకున్నారు. ఈ క్రమంలోనే అసహజరీతిలో ఇద్దరి మధ్య ప్రేమ చిగురించింది. దీంతో జీవితాంతం కలిసి జీవించాలనుకుని ఇంట్లో నుంచి వెళ్లిపోయి పెళ్లి చేసుకున్నారు. వీరి బంధానికి పెద్దలు అడ్డు చెప్పడంతో మనస్తాపానికి గురై ఓ యువతి(19) ఉరేసుకుని ఆత్మహత్య చేసుకుంది. ఈ ఘటన రంగారెడ్డి జిల్లా శంకర్‌పల్లి మండలంలోని ఓ గ్రామంలో చోటుచేసుకుంది.

పోలీసులు, బంధువుల కథనం ప్రకారం.. మండలానికి చెందిన ఓ యువతి(19) డిగ్రీ సెకండియర్ చదువుతోంది. ఇంటర్ ఖమ్మం జిల్లా పాల్వంచలో హాస్టల్‌లో ఉండి చదువుకుంది. ఆ సమయంలో అదే కాలేజీలో చదువుతున్న ఖమ్మం జిల్లా మణుగూరుకి చెందిన ఓ యువతి(24)తో స్నేహం ఏర్పడి ప్రేమకు దారితీసింది. జీవితాంతం కలిసుండాలని నిర్ణయించుకుని ఇద్దరూ గతేడాది జనవరిలో ఇళ్లల్లో నుంచి పారిపోయి వికారాబాద్‌లోని ఓ గుడిలో పెళ్లి చేసుకున్నాడు. అక్కడే ఓ గదిని అద్దెకు తీసుకుని 3 నెలల పాటు ఉన్నారు. కుటుంబసభ్యుల ఫిర్యాదుతో పోలీసులు వీరి ఆచూకీ కనిపెట్టి కౌన్సెలింగ్ ఇచ్చి ఇంటికి పంపించారు.
అయినప్పటికీ తీరు మార్చుకోని ఇద్దరు యువతులు తరుచూ ఫోన్లో మాట్లాడుకుంటున్నారు. ఈ విషయాన్ని ఇటీవలే పసిగట్టి యువతి(19) తల్లిదండ్రులు ఆమెను మందలించారు. ఇదే విషయమై కొద్దిరోజులుగా గొడవలు జరుగుతున్నాయి. దీంతో తన ప్రియురాలు తనకు శాశ్వతంగా దూరమవుతుందన్న ఆందోళన చెందిన ఆమె శుక్రవారం ఇంట్లో ఎవరూ లేని సమయంలో ఉరేసుకుని ఆత్మహత్య చేసుకుంది.